O conselleiro de Sanidade salienta a importancia de traballar na concienciación da mocidade sobre a doazón de medula ósea
Julio García Comesaña presidiu hoxe o acto de entrega dos premios do VII Concurso Universitario de Curtametraxes relacionado coa doazón e os transplantes de medula ósea
O conselleiro de Sanidade, Julio García Comesaña, presidiu o acto de entrega de premios aos gañadores do sétimo Concurso Universitario de Curtametraxes relacionado coa doazón e o transplante de medula ósea, promovido pola Coordinación Autonómica de Transplantes da Axencia Galega de Doazón de Órganos e Sangue (ADOS).
O acto, que tivo lugar esta mañá na Consellería de Sanidade, contou tamén coa presenza do director xeral de Asistencia Sanitaria do Sergas, Jorge Aboal; da directora de ADOS; Marisa López; e da coordinadora autonómica de transplantes, Encarnación Bouzas.
O titular da carteira sanitaria do Executivo galego subliñou a importancia de seguir traballando na creación dunha conciencia solidaria favorable ao xesto altruísta da doazón e o transplante nos distintos niveis educativos, en especial no ámbito universitario.
Así mesmo, o conselleiro salientou o esforzo que se realiza dende a Coordinación Autonómica de Transplantes de ADOS para fomentar a información e sensibilización relativa á doazón e o transplante de medula ósea ao colectivo universitario, campo no que se circunscribe esta sétima edición do Concurso de Curtametraxes.
Neste punto, Comesaña lembrou que ADOS é o centro de referencia en Galicia para a tipaxe dos doadores de medula ósea integrados no Rexistro Español de Medula Ósea (REDMO) dende hai mais de dúas décadas e que, na actualidade, contabiliza un total de 13.696 doantes galegos dispoñibles.
Premiados
Nesta sétima edición do Concurso Universitario de Curtametraxes relacionado coa doazón e o transplante de medula ósea, acadou o primeiro premio o traballo “Démoslle a volta á partida”, realizado polo alumno da Facultade de Comunicación Audiovisual da Universidade de Vigo, David Hortas García.