A Policía Autonómica levanta 6 actas de infracción nun dispositivo de prevención de consumo de alcohol por menores realizado nas festas da Carballeira de Lugo

Lugo, 25 de marzo de 2024

Axentes da xefatura provincial da Policía Autonómica en Lugo levaron a cabo un dispositivo de prevención de consumo de alcohol por menores de idade o 20 de marzo, no marco das festas da Carballeira de Lugo. Como resultado das inspeccións identificouse a 45 persoas e levantáronse 6 actas de infracción por parte de menores na vía pública.

En concreto, tres das actas correspóndese con consumo de alcohol e de infracción tanto da Lei 2/1996, de 8 de maio, de Galicia, sobre drogas como  da Lei 11/2010, de 17 de decembro, de prevención de consumo de bebidas alcohólicas en menores de idade. As tres actas restantes están relacionadas con infraccións da Lei Orgánica 4/2015, do 30 de marzo, de protección da seguridade cidadá, por tenencia de sustancia estupefacientes na vía pública.

O dispositivo enmárcase nas actuacións para velar polo cumprimento da Lei 11/2010, de 17 de decembro, de prevención do consumo de bebidas alcohólicas en menores de idade, co obxectivo de previr a venda e o subministración a menores de idade, tanto en  locais de ocio como bares, pubs ou discotecas coma en supermercados e tendas 24 horas que sexan establecementos expendedores de alcohol e tabaco. Tamén se efectúan intervencións preventivas nas concentracións da mocidade nas vías públicas, para controlar e evitar o consumo ilícito.

A actividade dos axentes céntrase sobre todo en tarefas de inspección a locais e control e vixilancia das zonas de ocio frecuentadas por menores de idade. Os obxectivos pasan por acadar que os establecementos se axusten á normativa en materia de alcohol e tabaco, pero tamén moi especialmente que os menores de idade adopten pautas de conduta saudables, evitando o consumo destes produtos a idades temperás polas importantes repercusións para a saúde que teñen estes consumos na mocidade.