A Xunta lembra que as familias poden solicitar praza nas súas escolas infantís ata o vindeiro día 5 de abril
Ofértanse 10.500 prazas de 0 a 3 anos nos centros de titularidade autonómica para o curso 2024-2025, que comezará o 6 de setembro
Como novidade, este ano as familias cuxos proxenitores traballen terán máis puntuación á hora de acceder ás escolas
A atención educativa volverá ser gratuíta para o 100% do alumnado e en todos os centros da comunidade, con independencia da súa titularidade
Santiago de Compostela, 30 de marzo de 2024
A Xunta de Galicia mantén aberto o prazo ata o 5 de abril para solicitar praza nas súas escolas infantís de cara ao vindeiro curso 2024-2025. Ofértanse arredor de 10.500 prazas de 0 a 3 anos distribuídas entre os centros da Axencia Galega de Servizos Sociais (Agass) e do Consorcio Galego de Servizos de Igualdade e Benestar. O novo curso comezará o vindeiro día 6 de setembro.
As solicitudes poderán remitirse de xeito electrónico a través da sede da Xunta de Galicia ou acudindo de xeito presencial a calquera dos rexistros oficiais. Este ano, como novidade, as familias cuxos proxenitores traballen terán máis puntuación á hora de acceder ás escolas. Desta forma, terán máis facilidades para atender ás súas necesidades de conciliación.
O vindeiro curso será o terceiro no que a atención educativa será 100% gratuíta para todos os nenos e en todas as escolas infantís da comunidade, con independencia da súa titularidade. O Goberno galego inviste 60 millóns de euros este ano na gratuidade, da que se poden beneficiar unhas 32.000 familias e para as que esta medida supón un aforro medio de 3.000 euros por curso.
