O director xeral de Asistencia Sanitaria do Servizo Galego de Saúde, Alfredo Silva, e o delegado territorial da Xunta, Javier Arias, participaron en Lugo nas II Xornadas de prevención e sensibilización do suicidio e novas adiccións na xuventude
Máis de 1.400 estudantes participan no programa YAM co que a Xunta promove a saúde mental na adolescencia
As Consellerías de Sanidade e de Educación, Ciencia, Universidades e Formación Profesional colaboran no ensaio clínico que se desenvolve nas aulas para fomentar que a xuventude sexa coñecedora e consciente da súa saúde mental
Desde este curso 1.416 estudantes de 78 centros educativos de toda Galicia participan nesta iniciativa
No marco do Plan de Prevención do Acoso Escolar, o Goberno galego ofrecerá obradoiros para familias a través da Escola Galega de Nais e Pais
Lugo, 22 de maio de 2024
A Xunta ten en marcha o programa YAM para a promoción da saúde mental na adolescencia no que participan desde este curso 1.416 estudantes de 78 centros educativos de toda Galicia.
Este proxecto das Consellerías de Sanidade e de Educación, Ciencia, Universidades e Formación Profesional foi presentado hoxe en Lugo no marco das II Xornadas de prevención e sensibilización do suicidio e novas adiccións na xuventude, organizadas pola Fundación ALAR e nas que participaron o delegado territorial da Xunta en Lugo, Javier Arias, e o director xeral de Asistencia Sanitaria do Servizo Galego de Saúde, Alfredo Silva.
O programa YAM (siglas en inglés de Xuventude consciente da saúde mental) desenvólvese nas aulas para que adolescentes de 13 a 17 anos reflexionen sobre as súas propias emocións. A iniciativa fai fincapé no apoio entre iguais a compañeiros ou compañeiras que se estean a sentir mal.
Na súa intervención, o delegado territorial da Xunta salientou a importancia de “manter unha intensa e fluída colaboración con colectivos sociais e sempre cun enfoque transversal, involucrando a diferentes departamentos das Consellerías implicadas”.
Pola súa banda, o director xeral de Asistencia Sanitaria do Servizo Galego de Saúde avanzou que, no marco do Plan de Prevención do Acoso Escolar, as Consellerías de Sanidade e de Educación formaron a profesionais ao longo dos dous últimos anos que impartirán obradoiros para familias de Educación Infantil e Secundaria a través da Escola Galega de Nais e Pais.
A Xunta desenvolveu o Plan de Saúde Mental Poscovid-19 2020-2024 cun investimento de 83 millóns de euros, un plan que incluíu a dotación de persoal para os novos hospitais de día de saúde mental infanto-xuvenil (un en cada área sanitaria) ou a implantación da vía rápida de atención ao suicidio na mocidade, cunha demora de menos de 7 días.
