Santiago de Compostela, 30 de xullo de 2024

A directora xeral de Mobilidade, Judit Fontela, reuniuse hoxe co director xeral de Alsa España, Víctor López. A empresa opera en tres concesións de transporte público en Galicia, coa liña Barreiros-Ribadeo, o leste da comarca da Coruña e o servizo metropolitano de Ferrol.

Judit Fontela incidiu na aposta da Xunta por un transporte público sostible e capaz de adaptarse ás necesidades reais da cidadanía, en constante evolución. Nesta liña, destacou as diferentes medidas impulsadas no marco do Plan de Transporte Público de Galicia co obxectivo de facilitar a mobilidade, como o incremento do número de paradas ou as bonificacións existentes.  

Pola súa banda, nesta primeira xuntanza coa directora xeral, Víctor López presentou o seu modelo de negocio, baseado na sostibilidade e calidade do servizo. Segundo sinalou, nos últimos anos renováronse preto dun cento de vehículos que operan nas concesións en Galicia e incrementouse o cadro de persoal ata chegar os 400 traballadores.