Santiago de Compostela, 4 de setembro de 2024

A directora xeral de Administración Local, Natalia Prieto, fixo hoxe balance no Parlamento galego das axudas da Xunta destinadas a apoiar aos concellos turísticos que nos meses de verán experimentan un elevado incremento de poboación na prestación de servizos relacionados coa seguridade co obxectivo de garantir o benestar da veciñanza e visitantes.

En concreto, abordou os detalles da convocatoria de axudas destinada á contratación de auxiliares de Policía Local entre o 1 de xuño e o 30 de setembro deste 2024. Estas subvencións do Plan específico de subvencións para a contratación de auxiliares de policía local contaron con 11 concellos beneficiarios -Sanxenxo, O Grove, Baiona, A Guarda, Miño, Poio, Cangas, A Pobra do Caramiñal, Cambados, Vilagarcía de Arousa e Monforte de Lemos- do orzamento total de 145.000 euros.

Como lembrou a directora xeral, estas achegas contribúen a cubrir parte dos gastos salariais dos efectivos que reforzan estes meses o cadro de persoal de Policía Local no posto de auxiliares. As contías que perciben as entidades locais beneficiarias oscilan entre os 21.500 e os 8.000 euros que lle corresponden segundo a porcentaxe que supoñen as prazas de aloxamento sobre o total de habitantes.

Natalia Prieto lembrou que na selección dos municipios beneficiarios tivéronse en conta outros criterios, entre eles, contar con máis de 5.000 habitantes, experimentar na tempada de verán un incremento estacional de poboación ou ter un mínimo de 1.000 prazas hoteleiras. Ademais, dispoñen da declaración como municipios turísticos galegos e dun corpo de policía local. Participaron tamén no proceso selectivo unitario convocado o pasado febreiro para a cobertura de postos de auxiliares de policía local e, alternativamente, teñen convocados procesos selectivos para cubrir postos desta categoría durante este ano.

Desde a posta en marcha deste plan, en 2012, o Goberno galego leva investidos máis de 1,1 millóns de euros no financiamento da contratación de auxiliares de policía local durante a tempada de verán nos concellos turísticos da comunidade. Como sinalou a directora xeral de Administración Local, mantense o financiamento destas axudas cun importe que representa máis do dobre respecto á primeira convocatoria, isto é, dos 60.000 euros de 2012 aos 145.000 deste exercicio.

Ademais, incidiu en que estas subvencións permiten reforzar a eficacia dos corpos policiais dos municipios beneficiarios e facilitar ás entidades locais a prestación de servizos a prol da seguridade de veciñanza e visitantes. Neste caso -engadiu- coas achegas deste plan preténdese “reforzar a seguridade nos concellos máis turísticos cun elevado incremento da poboación estacional na época estival”.

Segundo Natalia Prieto, trátase “dun claro exemplo da colaboración da Xunta cos concellos coa finalidade de contribuír á calidade do turismo e á satisfacción das persoas que visitan a comunidade”.

Nesta liña, lembrou outras medidas relacionadas co reforzo da seguridade nos municipios galegos a través do apoio da Administración autonómica como as axudas á contratación de persoal dedicado á prestación de servizos de vixilancia, rescate e salvamento en instalación acuáticas ou as contías anuais para o funcionamento e a dotación de equipamento de servizos de emerxencias de competencia municipal -Grupos de Emerxencias Supramunicipais (GES) e Agrupacións de Voluntarios de Protección Civil (AVPC)- así como a súa formación e a dos efectivos de forzas e corpos de seguridade desde a Academia Galega de Seguridade Pública (AGASP).