Ourense, 23 de novembro de 2024

O conselleiro de Sanidade, Antonio Gómez Caamaño, inaugurou esta mañá en Ourense o LIII Congreso Anual da Sociedade Galega de Reumatoloxía, SOGARE, un encontro no que reumatólogos chegados do conxunto de centros hospitalarios galegos analizarán os últimos avances producidos no diagnóstico e no tratamento das enfermidades reumatolóxicas.

Durante o acto, no que tamén participou o xerente da área sanitaria de Ourense, Verín e O Barco de Valdeorras, Santiago Camba, o titular da carteira sanitaria da Xunta referiuse aos 30 millóns de euros que o Executivo autonómico inviste cada ano no tratamento de enfermidades inflamatorias autoinmunes.

Apuntou o compromiso do Executivo galego cos pacientes que sofren algunha destas enfermidades e avogou por seguir a traballar na procura de acadar a excelencia asistencial dentro do ámbito da reumatoloxía.

Nesta liña, lembrou que é preciso avanzar no deseño de novas estratexias co obxectivo de acadar unha diagnose máis precoz, a protocolarización dos tratamentos e o impulso de novas terapias. E puxo en valor o traballo que desenvolven as asociacións de pacientes no fomento da educación sanitaria entre a cidadanía.

Durante a xornada de hoxe, o paraninfo do IES Ramón Otero Pedrayo acolle aos principais especialistas da sanidade pública galega para compartir coñecementos e experiencias na práctica clínica nesta especialidade.

O programa do LIII Congreso de SOGARE recolle diferentes mesas redondas e conferencias nas que se abordarán, entre outros temas, as novidades vinculadas á patoloxía inflamatoria crónica, os avances referidos a artrite reumatoide, o manexo dos pacientes con enfermidade psoriásica; a espondiloartrite, ou as novas opcións terapéuticas vencelladas á enfermidade da gota.

A artrite reumatoide en Galicia

A Xunta aposta pola innovación para seguir mellorando a calidade de vida dos pacientes con artrite, realizando un investimento anual de 30 millóns de euros para tratar aos pacientes con enfermidades inflamatorias inmunomediadas máis prevalecentes, como é o caso da artrite reumatoide.

No que vai de ano, os usuarios da sanidade pública galega precisaron máis 300.000 consultas médicas vencelladas a esta especialidade.

A artrite reumatoide é unha enfermidade inflamatoria crónica que precisa dun maior coñecemento, dunha abordaxe multidisciplinar e dunha garantía de acceso a todas as terapias innovadoras para que as persoas a padecen poidan dispoñer dunha mellor calidade de vida.

Segundo os últimos datos, a artrite reumatoide afecta en España a un total 420.000 persoas, das que 27.000 se atopan en Galicia. Deles, máis do 42% dos pacientes que residen na comunidade necesitan da axuda doutra persoa para realizar as actividades do día a día.

Actualmente, só o 30% das persoas que conviven con artrite reumatoide acadan a súa remisión, é dicir, consegue controlar os síntomas propios da patoloxía como a dor, a inflamación ou a fatiga.