Ferrol, 27 de decembro de 2024

A Xunta de Galicia dona á ONG  Briegal material especializado para a loita contra os incendios co fin de contribuír á campaña emprendida pola entidade para equipar aos bombeiros de Perú que se enfrontan aos incendios forestais que están a arrasar grandes áreas no país andino. A delegada territorial de Ferrol, Martina Aneiros, e a portavoz do Concello de Ferrol, Pamen Pieltáin; xunto ao presidente da ONG, Manuel Tato, e o secretario, Diego Rico, achegáronse estes días á nave onde teñen almacenado o material que será enviado a Perú nos próximos días. 

Entre o material cedido pola Consellería do Medio Rural atópanse equipos electrónicos como emisoras, micrófonos, portátiles, baterías, cargadores e bases de carga; ademais de equipos de autoprotección como fundas ignífugas, botas, gafas, máscaras, camisetas , cascos, cubrecalugas e caixas de filtros para máscaras.

Briegal é unha organización de axuda humanitaria e cooperación ao desenvolvemento especializada en actuacións ante emerxencias. Constituída por voluntarios de diferentes servizos profesionais como bombeiros, sanitarios e corpos de seguridade, ten por obxecto prestar axuda e rescate dende os primeiros minutos dunha catástrofe.

A delegada territorial destacou que o Goberno galego incrementa para o próximo exercicio nun 10,3% o orzamento destinado á cooperación para o desenvolvemento ata preto dos 10M€, co obxectivo de reforzar proxectos de educación para o desenvolvemento, de axuda humanitaria e emerxencias, e de cooperación no exterior promovidos por ONGD e outros axentes.