Santiago de Compostela, 13 de xaneiro de 2025

O Diario Oficial de Galicia publica hoxe a composición do tribunal para o desenvolvemento das probas de aptitude profesional (CAP) para o exercicio de condutor de transporte de mercadorías e de viaxeiros por estrada.

A resolución de nomeamento do tribunal para obter o certificado do CAP, integrado por cinco membros da Dirección Xeral de Mobilidade - presidente, tres vogais e o secretario- , inclúe a convocatoria das probas para este ano 2025. A Xunta realizará oito convocatorias ao longo deste exercicio para a obtención do CAP. 

O prazo de inscrición para a primeira delas pechouse o pasado 30 de decembro, correspondendo ao tribunal a fixación da hora e data dos exercicios desta e seguintes convocatorias das probas, que se celebrarán en Santiago de Compostela. A mesma será publicada na web da dirección xeral de Mobilidade cunha antelación mínima de dez días hábiles á celebración.  

As persoas admitidas nas convocatorias para obter o certificado de aptitude profesional serán convocadas para cada exercicio nun único chamamento, debendo presentarse á realización das probas provistas de DNI o documento acreditativo da súa identidade.

O tempo para a realización do exame será de dúas horas, valorándose con 1 punto as respostas correctas, e as erróneas contestadas penalizaranse con 0,5 puntos negativos. Para aprobar o exame será necesario obter unha puntuación non inferior á metade do total de puntos posibles.

Estas convocatorias correspóndenlle á Xunta. As persoas aspirantes deben superar os cursos de formación e cumprir os requisitos esixidos no Real Decreto 284/2021, de 20 de abril, polo que se regula a cualificación inicial e a formación continua dos conductores de determinados vehículos destinados ao transporte por estrada, para poder participar nas probas de constatación da cualificación inicial. 

O certificado de aptitude profesional acreditará que o condutor superou os cursos e os exames esixidos e será expedido polos órganos autonómicos competentes para o outorgamento de autorizacións habilitantes para a realización do transporte público discrecional de viaxeiros e mercadorías por estrada. Estes dispositivos reforzan as garantías de seguridade e transparencia e incrementan a profesionalización e a competitividade no sector do transporte.

Os exames teñen como obxectivo acadar os certificados profesionais para a condución de distintas categorías de vehículos: camión (C), autobús (D) e remolque (E). 

De modo máis concreto, levaranse a cabo probas para as categorías D1, que inclúe vehículos de non máis de 16 pasaxeiros, ademais do condutor e remolque de ata 750 quilos; e D1 + E, que lle engade á anterior descrición o remolque de máis de 750 quilos. Tamén se desenvolverán probas para as categorías D, é dicir, vehículos de máis de oito pasaxeiros e sen límite superior, ademais do condutor e remolque ata 750 quilos; ou D + E, que engade á anterior descrición a posibilidade de remolque de máis de 750 quilos. 

No caso dos camións, haberá exames para o certificado C1, para vehículos de 3.500-7.500 MMA e ata oito pasaxeiros; C1 + E, con remolque de máis de 750 quilos; C, para camións de máis de 3.500 MMA (masa máxima autorizada) e remolque de ata 750 quilos; ou C + E, vehículos de máis de 3.500 MMA e sen límite e remolque de máis de 750 quilos.