Valga (Pontevedra), 13 de febreiro de 2025

A conselleira do Medio Rural, María José Gómez, acompañada polo director xeral de Defensa do Monte, Manuel Rodríguez, presentou hoxe o proxecto da futura Base de Unidades Operativas (BUO) de Valga para favorecer a conciliación entre traballo e descanso do persoal do Servizo de Prevención e Defensa contra os Incendios Forestais.

Esta nova infraestrutura conta cun orzamento de preto de medio millón de euros e, segundo destacou a conselleira, sumarase á rede de prevención, detección, intervención e defensa contra os incendios forestais espallada polo territorio galego. De acordo coas previsións, as obras comezarán no segundo semestre deste ano e rematarán ao longo do 2026.

A conselleira do Medio Rural explicou que o proxecto conta cun edificio de dúas plantas. Na inferior situarase unha sala de control, os vestiarios, garaxes, o almacén, baños e espazos para a distribución dos mesmos; na superior haberá unha oficina, a sala de xuntas e a emisora, así como un baño e unha terraza exterior. En definitiva, sinalou a titular do departamento, tanto bombeiros forestais como condutores de motobomba, axentes e outros integrantes do dispositivo disporán dun espazo dotado con todos os medios e equipamentos necesarios para facer máis eficiente a actuación na loita contra os incendios.

Ademais, segundo indicou María José Gómez, esta construción combinará o emprego de formigón e madeira impulsando a sustentabilidade do proxecto e facéndoo máis respectuoso co medio ambiente.

A maiores desta BUO, neste ano está previsto que se rematen as construcións das de Muíños, en Ourense, a de Mondoñedo, en Lugo; e a de Rianxo, na Coruña. A elas sumarase este proxecto da BUO de Valga, mantendo a aposta da Consellería do Medio Rural en materia de dotación de infraestruturas nos distritos forestais.

Prevención e loita contra os incendios

A Consellería do Medio Rural mantén o seu compromiso coa prevención e loita contra os incendios forestais e, por iso, neste ano destinará case 90 millóns de euros para esta cuestión, tanto para tarefas de prevención como de extinción de lumes.