Mugardos (A Coruña), 12 de marzo de 2025

A delegada territorial da Xunta en Ferrol, Martina Aneiros, acompañada do alcalde de Mugardos, Juan Domingo de Deus, e la directora territorial da Consellería de Vivenda e Planificación de Infraestruturas, Begoña Freire, supervisou esta mañá os traballos de conservación que a Xunta está a acometer na senda peonil e ciclista da estrada autonómica AC-130, entre Ares e Mugardos, ao seu paso por este último termo municipal.

Os traballos, cun investimento autonómico de 50.000 euros, desenvólvense entre os puntos quilométricos 0+970 e o 1+870 ata o límite co municipio de Ares. En concreto, estase a actuar sobre unha superficie de 900 metros lineais e de 2,50 metros de ancho. Nos traballos de rehabilitación desta senda empregouse formigón coloreado.

Esta infraestrutura viaria de 3,7 quilómetros de lonxitude, foi impulsada pola Xunta de Galicia cun investimento de 1,5 M€ coa finalidade de canalizar de forma segura o tránsito peonil e ciclista nesta estrada autonómica. Xunto a esta senda, o Goberno galego impulsou a construción doutras dúas no municipio de Mugardos, a que conecta Franza e Rilo pola estrada AC-133 e a que discorre entre O Peteiro e O Baño, en paralelo á estrada AC-131.

A delegada territorial destacou que deste xeito a Xunta continúa dotando as vías autonómicas de itinerarios seguros, sostibles e saudables para favorecer os desprazamentos a pé dos peóns que son os usuarios máis vulnerables das estradas.