Santiago de Compostela, 21 de abril de 2025

O Diario Oficial de Galicia publica hoxe a resolución da Dirección Xeral de Recursos Humanos do Servizo Galego de Saúde pola que se procede ao nomeamento como persoal estatutario fixo e á adxudicación de destino definitivo aos aspirantes seleccionados no proceso selectivo, polo sistema de concurso, para o ingreso na categoría de enfermeiro especialista en saúde mental. 

A resolución da convocatoria deste proceso realizouse en execución da Lei 2/2022, do 6 de outubro, de medidas extraordinarias dirixidas a impulsar a provisión de postos de difícil cobertura de determinado persoal estatutario con título de especialista en ciencias da saúde do Servizo Galego de Saúde, que establece medidas extraordinarias e temporais en materia de emprego público dirixidas a garantir a adecuada atención sanitaria de toda a poboación galega. 

Neste proceso selectivo adxudícase destino definitivo para 94 aspirantes. Estas prazas engádense ás 31 prazas ofertadas no proceso selectivo mediante o sistema de concurso-oposición e ás 2 prazas ofertadas no proceso selectivo de estabilización, polo sistema de concurso de méritos.

Dos 94 destinos adxudicados, 19 prazas son no Complexo Hospitalario Universitario da Coruña; 6 no Complexo Hospitalario Universitario de Ferrol; 8 no Hospital Universitario Lucus Augusti; 13 no Complexo Hospitalario Universitario de Ourense; 11 no Complexo Hospitalario Universitario de Pontevedra; 15 no Complexo Hospitalario Universitario de Santiago de Compostela; 20 no Complexo Hospitalario Universitario de Vigo; 1 no Hospital Público de Valdeorras; e 1 no Hospital Público de Verín. 

Os aspirantes nomeados disporán do prazo dun mes, a contar desde o día seguinte ao da publicación desta resolución no Diario Oficial de Galicia, para incorporarse á praza adxudicada. Polo tanto, o prazo finaliza o 21 de maio.

A falta de incorporación no prazo referido, cando sexa imputable á persoa interesa e non responda a causas xustificadas, producirá o decaemento do seu dereito a obter a condición de persoal estatutario fixo como consecuencia do concreto proceso selectivo. En casos de forza maior, e por instancia do interesado, a Dirección Xeral de Recursos Humanos do Servizo Galego de Saúde poderá prorrogar o prazo de toma de posesión.

As persoas nomeadas poden dirixir todas as dúbidas e consultas relacionadas con este proceso selectivo ao enderezo de correo electrónico: oposicions@sergas.es. Estas consultas non terán a consideración de reclamacións nin recursos.