Santiago de Compostela, 5 de maio de 2025

O Portal de Contratos Públicos de Galicia publica hoxe a licitación, por importe de 85.464 euros, do contrato para o subministro de ecógrafos portátiles con destinos ás unidades multidisciplinares de enfermidades raras do Servizo Galego de Saúde.

O novo equipamento, empregado para a obtención de imaxes mediante ultrasóns, terá como destino os complexos hospitalarios da Coruña e de Santiago de Compostela e o Hospital Público Álvaro Cunqueiro de Vigo.

A ecografía é un procedemento de diagnóstico de imaxe que permite ver órganos e estruturas brandas dentro do corpo, mediante o emprego de ondas sonoras de alta frecuencia emitidas a través dun transdutor que capta o eco de diferentes amplitudes e que se produce ao rebotar nos órganos. Estes sinais, unha vez procesadas por un computador, trasladan unha serie de imaxes dos tecidos examinados que se visualizan na pantalla en diferentes tons de grises ou cores.

Actualmente, esta tecnoloxía permite visualizar calquera parte do corpo identificando con claridade a forma e tamaño de cada estrutura do interior. O equipamento que a Xunta adquirirá posibilitará, como mínimo, a realización de exploracións anatómicas de tipo: abdominal, musculoesqueléticas, vasculares (estenose, resistencia e pulsatilidade) urolóxicas (vexiga, ril, próstata e testículo), partes brandas, obstétricas (biometría fetal e embrionaria) e xinecolóxicas.

As empresas interesadas en participar neste procedemento teñen de prazo ata o vindeiro 21 de maio para presentar as súas ofertas.