Santiago de Compostela, 6 de maio de 2025

A Xunta recibe 4 ofertas para executar  as obras de mellora na Ponte do Pedrido, que une os concellos de Bergondo e Paderne na desembocadura da ría de Betanzos e que inclúen a renovación total da súa iluminación, cun investimento de 972.700 euros.

Esta actuación prevese adxudicar no verán e que estea rematada a finais deste ano.

Trátase dunha actuación enfocada a poñer en valor esta emblemática ponte na AC-164 e resaltar os elementos desta estrutura símbolo da historia e da enxeñería en Galicia, que conecta os concellos de Bergondo e Paderne.

Esta vía rexistra un intenso tráfico, de 10.336 vehículos/día, ao ser alternativa libre de peaxe á autoestrada estatal.

A nova instalación estará constituída por 194 proxectores LED e 35 luminarias LED de iluminación viaria, e resaltará todos os elementos da ponte: os valores arquitectónicos e estruturais.

Isto permitirá, ademais da posta en valor da ponte, a mellora da eficiencia enerxética e o control da contaminación luminosa.

A intervención completa tamén ás obras levadas a cabo con anterioridade coa reparación dos distintos elementos da ponte, dirixida a reforzar a súa durabilidade, e enmárcanse nas accións de mantemento e conservación de obras de paso e estruturas das vías de titularidade da Xunta.