Santiago de Compostela, 25 de maio de 2025

A Xunta comezará esta vindeira semana os traballos de limpeza e roza nas marxes das estradas autonómicas LU-122, ao seu paso polos concellos da Pastoriza, Riotorto, Mondoñedo e Lourenzá; na estrada OU-402, en Ourense e en Cortegada; e na PO-344, no seu percorrido polo concello pontevedrés de Tomiño.

Ademais, continuarán os traballos de roza que se están a levar a cabo en distintos treitos das vías de titularidade da Xunta nestas provincias e na da Coruña.

Deste xeito, na provincia da Coruña, proseguirán as labores iniciadas hai unhas semanas nas estradas AC-413, ao seu paso por Cerceda e Carballo; na AC-566 no municipio de Valdoviño; e na vía de altas prestacións CG-1.5 en Noia.

Tamén proseguiran as tarefas en execución na provincia de Lugo na vía de altas prestacións GG-2.2, en Bóveda, e na CG-2.3, en Xove.

Ademais, na provincia de Pontevedra, seguirá avanzándose nas labores de limpeza e roza nas marxes da PO-340, ao seu paso por Tui e Nigrán; na autovía AG-4.6, en distintos tramos da vía de altas prestacións e da CG-4.1, que unen os municipios de Moaña e Cangas; e tamén na VG-4.6, en Cangas e Bueu.

Seguridade viaria

Todas estas intervencións consisten na limpeza e roza de vexetación na zona de dominio público das estradas de titularidade da Xunta, e na reposición ou reparación de elementos de valado perimetral das estradas autonómicas ou no acondicionamento de zonas verdes en sendas peonís e glorietas.

A Xunta, con este programa, segue a intensificar as súas accións para previr o risco de lumes e contribuír ao reforzo da seguridade viaria mediante o aumento da visibilidade e as accións para facilitar o tránsito de peóns e ciclistas.

As actuacións da Consellería de Vivenda e Planificación de Infraestruturas están enmarcadas no contrato coa empresa pública Seaga para o control da biomasa das marxes das estradas autonómicas, que conta cun investimento total de 4 M€.