A Coruña, 2 de xullo de 2025

A delegada da Xunta, Belén do Campo, informou está mañá da resolución das axudas a clubs deportivos, sociedade anónimas deportivas, seccións deportivas e núcleos de adestramento deportivo especializado (NADE) de Galicia para o desenvolvemento de actividades deportivas,  que estaba dotada con 2 millóns de euros para toda Galicia en concorrencia competitiva. Neste senso, informou que na provincia da Coruña recibiron estas achegas 525 entidades e 5 centros de adestramento especializado por un importe total de case 810.000 euros e, concretamente, na comarca da Coruña recibiron estes apoios 161 entidades deportivas e catro núcleos de adestramento especializado por un importe de case 340.000 euros.

A delegada fixo estas declaracións durante unha visita ás instalacións do Sporting Club Casino beneficiario destas achegas para levar a cabo as súas especialidades de atletismo, billar, natación, pádel, tenis e xadrez. Ademais, destacou outro investimento da Xunta nestas instalacións por un importe de 25.000 euros para a reposición do céspede artificial de 5 pistas de pádel. Esta actuación executouse no ano 2024, beneficiaria da orde de axudas de construción, reforma, reparación, adecuación e mellora das instalacións deportivas con carácter plurianual e en concorrencia competitiva. 

Neste senso, a delegada lembrou que O Diario Oficial de Galicia acaba de publicar a orde pola que se establecen as bases reguladoras para a concesión, en réxime de concorrencia competitiva, de subvencións para a adquisición de equipamentos deportivos e procédese á súa convocatoria para o ano 2025, estando o prazo aberto ata o 7 de xullo. En total contará cun orzamento de preto de 1,5 millóns de euros (1.440.000 euros) para os clubs deportivos galegos, sociedades anónimas deportivas e as federacións deportivas galegas, que poderán recibir anticipos dos pagos de ata o 100 % da subvención concedida. 

O crédito distribuirase en dúas liñas en función da natureza dos destinatarios. A primeira será para os clubs deportivos e sociedades anónimas deportivas (1.162.000 euros), mentres que a segunda será para as federacións deportivas (278.000 euros). Dentro de cada unha das liñas, destinarase ata un 40 % do crédito para a adquisición de equipamento destinado á mobilidade, como furgonetas e vehículos de motor para o transporte de deportistas e material de competición e adestramento, como embarcacións. En ambas as liñas subvencionarase ata un máximo de 10.000 euros para o equipamento destinado á mobilidade e ata un máximo de 5.000 euros para o resto do material. En total, a Xunta sufragará o 80 % do custo do equipamento subvencionado. 

O prazo para executar o proxecto subvencionado e presentar a correspondente xustificación será ata o 31 de outubro de 2025.