Santiago de Compostela, 4 de xullo de 2025

O conselleiro de Sanidade, Antonio Gómez Caamaño, remarca a aposta do Servizo Galego de Saúde polas novas tecnoloxías para acadar un modelo de atención á dor máis personalizado e eficiente.

Na súa intervención na mesa inaugural do curso de verán Novas tecnoloxías na abordaxe da dor: avances e oportunidades, organizado pola Sociedade Española da Dor no Pazo de Fonseca, Gómez Caamaño sinalou especialmente o tratamento á dor oncolóxica.

“A intelixencia artificial pode cambiar o manexo de pacientes con dor, a maneira de diagnosticar, tratar e medir a dor”, indicou o conselleiro de Sanidade, quen lembrou que o Servizo Galego de Saúde emprega tanto a intelixencia artificial como a telemedicina e os novos dispositivos de monitorización na atención á dor.

Neste ámbito destaca a unidade do Complexo Hospitalario Universitario de Ourense foi a primeira de España acreditada coa norma de Acreditación de Dor Oncolóxica da Sociedade española de calidade asistencial.

O ano pasado as unidades da dor das sete áreas sanitarias superaron as 44.000 consultas, un 40 % máis que en 2020. Esta cifra reflicte o incremento da demanda e tamén a confianza nun modelo asistencial que está a evolucionar e a adaptarse ao uso de ferramentas como as novas tecnoloxías.

A consellería de Sanidade conta na Estratexia de calidade e seguridade do pacientes cunha liña específica para o tratamento e prevención da dor que integra, ademais da visión do paciente, tamén a da súa contorna familiar e a dos profesionais de todos os niveis asistenciais.

A isto súmase a Comisión Galega da Dor para aumentar a coordinación entre as distintas áreas, actualizar guías clínicas e promover a innovación clínica e tecnolóxica.