Sarria (Lugo), 17 de xullo de 2025

A Xunta aborda neste verán os traballos de reforzo de firmes nun total de 57 estradas autonómicas ao seu paso por 68 concellos das catro provincias galegas. A conselleira de Vivenda e Planificación de Infraestruturas, María M. Allegue, xunto ao delegado territorial da Xunta en Lugo, Javier Arias, fixo balance destas actuacións de conservación e mantemento na visita ás obras que se están a desenvolver en estradas do concello lucense de Sarria.

En concreto, a Administración autonómica vén de iniciar os traballos de reforzo de firmes en catro estradas (LU-536, LU-533, LU-622 e LU-636), ao seu paso por Sarria, O Saviñao e Láncara, cun investimento de 2,5M€. Actúase para mellorar case 21 quilómetros de viarios, nunha intervención que beneficiará a unha poboación de case 20.000 persoas nestes tres concellos.

Ademais, en Lugo tamén están en marcha na actualidade os traballos en 2 estradas (LU-113 e LU-530) en Cospeito, Lugo, Castroverde e Abadín, por 3,6M€.

Son actuacións que forman parte, como destacou a conselleira, do compromiso da Xunta para manter as estradas autonómicas en condicións de vialidade, limpeza, sinalización e comodidade, a fin de manter a seguridade viaria.

Allegue subliñou que estes traballos abórdanse cunha planificación e coa correspondente dotación de recursos, e destacou que a Xunta inviste este ano o maior orzamento da súa historia en materia de conservación e mantemento, con 68M€. Un orzamento que xa permitiu licitar obras de reforzos de firmes por máis de 43M€. “Unha aposta firme pola seguridade, a conectividade e o desenvolvemento sostible do noso territorio”, destacou a conselleira.

Entre estes traballos de reforzo de firmes, a Xunta acaba de adxudicar as obras para actuar nos viarios AC-419, AC-432, AC-441 e AC-442, que discorren polos concellos de Malpica, Ponteceso, Vimianzo, Camariñas, Santa Comba, Mazaricos, Zas e Dumbría, cun investimento de 2,6M€, e na provincia de Pontevedra comezan hoxe as intervencións noutros catro viarios ao paso polos municipios de Bueu, Cangas, Pontevedra e Ponte Caldelas, por 2,2M€.

En Ourense a Administración autonómica vén de rematar o reforzo de firme nas estradas OU-533, OU-602, OU-603, OU-622, OU-636 e OU-933 que discorren por O Bolo, Petín, Larouco, A Rúa, O Barco, Rubiá, Pobra de Trives, Quiroga (3M€) e ten licitadas por 2,8 M€ as obras de mellora de 13 travesías urbanas na cidade de Ourense, entre elas a renovación integral do treito da OU-413 na subida ao Seminario.

Ademais, en outono comezarán as obras de renovación integral do firme da autovía do Barbanza, licitadas por 11,9€ e para as que a Xunta recibiu 6 ofertas de empresas que está a avaliar. Os traballos desenvolverase nesta AG-11, que discorre por Boiro, Padrón, Dodro, Ribeira, Rianxo e A Pobra do Caramiñal ao longo dos máis de 40km do viario e tamén nos seus enlaces.

Vialidade invernal

Por outra banda, o Goberno galego vén de recibir un total de 120 ofertas para os oito contratos licitados por 184M€ para as tarefas de conservación ordinaria e vialidade invernal nas estradas autonómicas das catro provincias nos vindeiros catro anos. Estes contratos corresponden ás dúas zonas norte e sur no caso das provincias da Coruña, Lugo e Pontevedra, outro para os traballos na provincia de Ourense, que suman 175,3M€, e un contrato adicional para conservación específica de estruturas e obras de paso (8,3M€).