Santiago de Compostela, 8 de agosto de 2025

A Xunta adxudica a construción dunha senda peonil na estrada OU-212 no núcleo de Lebozán, situado no concello de Beariz, co fin de reforzar a seguridade viaria nesta contorna.

O contrato foi adxudicado por un importe de preto de 50.000 euros á empresa Construcciones Etelvino y Julio SL.

A Consellería de Vivenda e Planificación de Infraestruturas prevé comezar estes traballos nas vindeiras semanas.

Dita senda peonil dará continuidade ás beirarrúas existentes e facilitarán a mobilidade peonil entre as vivendas de Busto e o núcleo de Lebozán.

O obxectivo é reforzar a seguridade da estrada OU-212 coa execución desta senda peonil situada na marxe dereita do punto quilométrico 2+060 e 2+250, de 2 metros de ancho e bordo.

A obra da senda e o espazo dispoñible de Dominio Público Viario complétase coa execución dunha banda de beiravía de 50 cm a partir da liña branca actual.

Ademais a intervención incluirá as canalizacións de previsión de servizos de telecomunicacións, electricidade e iluminación. Na obra contémplase a disposición de sumidoiros que recollan a auga de escorrentía que discorra xunto ao bordo.

As obras executaranse en dominio público viario, polo que non necesitan  expropiacións.

A Consellería de Vivenda e Planificación de Infraestruturas continúa traballando na mellora da mobilidade en Beariz, facilitando uns desprazamentos seguros e eficientes.