A conselleira de Política Social e Igualdade agradeceu a colaboración e coordinación da Fundación San Rosendo e do seu persoal
Fabiola García visita ás persoas maiores da residencia da Mezquita desprazadas a Arnoia a causa do lume
Prevese que o regreso dos maiores ao seu municipio se poida realizar esta mesma tarde
A Xunta dispón de 220 prazas na provincia de Ourense para atender situacións de emerxencia como esta e a casos particulares
A Arnoia (Ourense), 13 de agosto de 2025
A conselleira de Política Social e Igualdade, Fabiola García, estivo esta mañá coas persoas maiores usuarias da residencia de A Mezquita que na xornada de onte foron trasladadas ao centro residencial Nosa Señora do Socorro na Arnoia. Este traslado, que afectou a 47 maiores, fíxose como medida de precaución pola proximidade do lume á residencia da Mequita.
Fabiola García comprobou que todas as persoas desprazadas se atopan en bo estado de saúde e sinalou que a previsión é que esta mesma tarde poidan regresar á súa residencia da Mezquita. Un traslado que se volverá facer en ambulancias.
A conselleira estivo acompañada na súa vista do director xeral de Maiores e Atención Sociosanitaria, Antón Acevedo, do alcalde da Arnoia, Rodrigo Aparicio, e do presidente da Fundación San Rosendo, José Luis Gavela, entidade á que pertencen os centros da Mezquita e A Arnoia. Fabiola García agradeceu á devandita fundación e ao seu persoal a colaboración e coordinación. Así mesmo, lembrou que a Xunta ten mobilizadas 220 prazas residencias na provincia de Ourense para atender situacións de emerxencia como esta e a casos particulares.
Imaxes relacionadas
