Santiago de Compostela, 6 de outubro de 2025

O conselleiro de Presidencia, Xustiza e Deportes, Diego Calvo, informou hoxe de que o Consello acordou inxectar outros 7,2 millóns de euros ás universidades de Santiago de Compostela e Vigo para “avanzar na renovación e na modernización dos seus edificios” ao abeiro do Plan de infraestruturas universitarias aprobado no 2023.

Tal e como explicou Calvo, o Plan está dotado de 40 millóns de euros e prevé mobilizar “100 millóns ata 2026”. Este investimento súmase, como unha cantidade adicional, ao Plan galego de financiamento universitario 2022-2026. Engádese, ademais, ao convenio asinado en 2021, por importe de 4,5M€, para a mellora da eficiencia enerxética das infraestruturas universitarias, como anticipo a este Plan de infraestruturas.

O obxectivo desta nova liña de actuación é seguir avanzando na consolidación da excelencia e calidade do Sistema Universitario de Galicia, a través de melloras nas infraestruturas dos sete campus, tanto rehabilitacións como construción de novos edificios modernos para facultades e centros de investigación adaptados aos retos de futuro.

Máis de 12 M€ xa en marcha na USC

No caso da Universidade de Santiago, o conselleiro salientou que a Xunta realizará unha achega de “case 4,1 M€ este ano que irán en exclusiva para a construción dunha nova facultade de Farmacia”. Situarase dentro da nova Cidade da Saúde da USC, un conxunto de edificios que acollerá tanto esta facultade como a de Enfermería, un centro de investigación na área de Ciencias da Saúde e un aparcadoiro.

A estrutura do complexo será modular e flexible, con espazos dedicados a aulario, biblioteca, área de goberno de ambas as facultades, espazos para a administración e os servizos auxiliares, laboratorios de prácticas e áreas de investigación, non segmentadas por centro senón por uso. Será tamén dun edificio enerxeticamente eficiente, cunha baixa demanda e con produción propia de enerxía mediante fontes renovables.

Con cargo a este plan, a Universidade de Santiago de Compostela acometeu xa obras de mellora na Facultade de Medicina e de rehabilitación na Facultade de Química. En concreto, recibiu xa 4,085M€ en 2023 e outro tanto en 2024, polo que o investimento en marcha nesta universidade co convenio de 2025 supera xa os 12M€.  O total da achega a esta universidade, de máis de 16,3M€, completarase en 2026 cunha nova anualidade do mesmo importe das mencionadas.

Actuacións da UVigo por máis de 9,3M€

Pola súa banda, Calvo explicou que a Universidade de Vigo destina a achega deste ano, de máis de 3,1 M€, a dous proxectos: avanzar na construción da Escola de Enxeñería Aeronáutica e do Espazo, no Campus de Ourense, e á rehabilitación do edificio Siemens na ETEA de Vigo.

No primeiro caso, o edificio contará con máis de 6.500m² dedicados a aulas, laboratorios punteiros e incubadoras de proxectos, ademais de zonas para administración e servizos.

Esta dotación vén reforzar a especialización e identidade científica do Campus da Auga, acreditado como campus especializado pola Xunta.

Ademais, a UVigo vai rehabilitar o edificio Siemens na ETEA para convertelo no Centro de Investigación Mariña (CIM). Precisamente a Xunta vén de ceder á Universidade deste espazo por un período máximo de 75 anos para poder avanzar neste proxecto.

O obxectivo fundamental do centro é contribuír á conservación e ao uso sustentable dos océanos, mares e recursos mariños a través da xeración e transferencia de coñecemento baseado na ciencia, a tecnoloxía e a innovación.

Con este novo convenio, o conselleiro salientou que “a achega á UVigo elévase xa aos 9,3M€” no marco deste plan. Ao abeiro dos convenios de 2023 e 2024, de 3,1M€ cada ano, a UVigo comezou as obras do devandito novo edificio da Escola de Enxeñería Aeronáutica e do Espazo en Ourense. A achega completarase en 2026 cunha nova anualidade do mesmo importe, ata sumar un total de máis de 12,4M€.

Situación dos convenios da UDC

No caso da Universidade da Coruña, os 2,81M€ do convenio de 2023 foron autorizados excepcionalmente para gastos correntes por petición da propia institución. A partida de 2024, polo mesmo importe, non foi executada por parte da UDC e está pendente de resolución, mentres que o convenio de 2025 non comezou aínda a súa tramitación.