Vigo, 9 de outubro de 2025

O director xeral de Xustiza, José Tronchoni, participou na inauguración da V Xornada laboralista, organizada polo Colexio Oficial de Graduados Sociais de Pontevedra, onde destacou o valor do diálogo, o pacto e o acordo na xustiza social, ao tempo que recoñeceu os profesionais do Dereito Laboral como pezas esenciais. “Estamos necesitados de negociacións tanto na xurisdición social coma no ámbito extraxudicial a través das negociacións colectivas e os acordos para o emprego”, apuntou.

O director xeral salientou tamén a necesidade de apostar pola formación continua nos ámbitos do Dereito Laboral e dos Recursos Humanos para afrontar os novos retos. Nesta liña, referiuse á importancia de desenvolver foros como o inaugurado hoxe para garantir a actualización e o intercambio de coñecementos sobre novidades normativas e procesuais, como son as novas leis de eficiencia organizativa e procesual.

Segundo sinalou, nestas xornadas abórdanse temas de máxima actualidade, como a intelixencia artificial e a súa influencia na vida xudicial. Neste sentido, referiuse as vantaxes desta ferramenta, como a axilización de procesos e a análise profunda de datos. A discriminación interseccional da muller e a xurisprudencia en indemnizacións e despido son outros dos temas que forman parte do programa do encontro.

Para José Tronchoni, o investimento en coñecementos “produce sempre os mellores beneficios”. O director xeral incidiu na aposta da Xunta pola formación como instrumento de xestión para o desenvolvemento de habilidades que permitan ofrecer servizos de calidade, conscientes de que esta adaptación non termina nunca debido á constante actualización normativa e os avances tecnolóxicos, así como ás peculiaridades de cada territorio. “Isto obríganos á dotación de novas infraestruturas, adecuadas para reducir o tempo e volume das tarefas co obxectivo de garantir unha Administración de Xustiza moderna, dixital e máis áxil”, engadiu.