Santiago de Compostela, 9 de outubro de 2025

O Servizo Galego de Saúde realizou no primeiro semestre do ano un total de 109.746 intervencións cirúrxicas, o que supón un incremento do 1,5 % respecto do mesmo período do ano anterior (108.079). Así mesmo, reduciu en 1.029 a cifra de pacientes que agardan por unha intervención, ao pasar dos 50.252 do primeiro semestre de 2024 aos 49.223 do mesmo período do ano en curso.

O informe de balance da actividade asistencial e de lista de espera do Servizo Galego de Saúde referido ao primeiro semestre do ano tamén sinala que o tempo medio de espera para unha intervención se reduciu en 1,8 días, ao pasar dos 71,1  dos seis primeiros meses do pasado ano a 69,3 días do semestre de 2025.

Neste primeiro semestre do ano, o Servizo Galego de Saúde realizou 14.244 intervencións de prioridade 1, cun tempo medio de espera de 17,7 días, o que supón 12,3 días por baixo dos 30 de espera marcados pola lei.

A porcentaxe de pacientes que superan os seis meses de espera para a realización dunha cirurxía na sanidade pública galega é dun 4,2 % (2.088 pacientes), moi inferior á media do Sistema Nacional de Saúde, cunha porcentaxe do 20,5 % a xuño de 2024.

Tamén é destacable o número de intervencións cirúrxicas realizadas en quirófanos robotizados nos primeiros seis meses do ano, que acada as 2.024, o que supón 150 máis que no mesmo período do ano anterior (incremento do 8 %).

Os servizos cirúrxicos con maior actividade son cirurxía xeral e dixestiva (19.573 intervencións), traumatoloxía (16.026) e oftalmoloxía (15.879).

Cómpre remarcar, igualmente, o incremento da actividade cirúrxica nos pacientes entre 75 e 90 anos, con 603 cirurxías máis que no mesmo período do ano anterior (27.226 fronte a 26.623), así como en pacientes de máis de 90 anos: 2.228 intervencións no primeiro semestre de 2025 fronte ás 2.046 do mesmo período do ano anterior, o que supón un incremento do 8,9 %.

Consultas e probas diagnósticas

No que atinxe á actividade das consultas médicas nos hospitais do Servizo Galego de Saúde, no primeiro semestre do ano fixéronse 2.600.827, o que supón 51.560 consultas máis que no mesmo período do ano anterior, un incremento do 2 %. Do total destas consultas, 2.304.417 foron presenciais.

O tempo medio de espera para a realización de primeiras consultas hospitalarias situouse en 57,3 días, cunha redución de 14,3 días respecto do mesmo período do ano anterior, e baixando da barreira dos 60 días.

Tamén diminuíron respecto do primeiro semestre do pasado ano, de xeito moi significativo, o número de pacientes pendentes dunha primeira consulta, -12,1 %, o que supón 26.000 doentes menos en espera.

Reduciuse de xeito considerable a porcentaxe de pacientes que superan os dous meses para a realización dunha consulta externa, xa que a xuño do pasado ano esta porcentaxe era do 41 %, situándose agora no 36,4 % (4,6 % menos). Esta porcentaxe presenta un valor moi por baixo do Sistema Nacional de Saúde, que a xuño de 2024 era do 54,6 %.

Os datos do primeiro semestre do ano tamén reflicten un incremento do 2,8 % da actividade das probas diagnósticas, en especial das de gran relevancia na práctica asistencial como as ecografías, 8.613 máis que no primeiro semestre do ano anterior, 4,1  % de incremento; os TAC, 10.227 máis, incremento do 5,8 %; e as probas endoscópicas, 3.225 máis, incremento do 4,8 %.

Igualmente é destacable o incremento do número de probas radiolóxicas realizadas, case 16.600 máis, así como o número de estudos e probas funcionais (15.662 máis).

O tempo medio espera para primeiras probas diagnósticas e/ou terapéuticas hospitalarias é de 83,7 días, moi similar ao do primeiro semestre do ano anterior.

Vías rápidas e lei de garantías

No Servizo Galego de Saúde están implantadas na actualidade nove vías rápidas por sospeita de patoloxía oncolóxica (oncohematolóxico, colon, endometrio, mama, melanoma, cabeza-colo, próstata, pulmón e vexiga). Para valoración e atención destas consultas por vía rápida está establecida unha espera inferior a 15 días.

No primeiro semestre do ano realizáronse un total de 13.504 consultas por vía rápida, preto de 1.000 máis que no mesmo período do ano anterior (945), o que supón un incremento do 7,5 %.

O tempo medio de espera das consultas por vía rápida foi de 6,6 días, moi similar ao do ano anterior e 8,4 días inferior ao compromiso establecido polo Servizo Galego de Saúde do tempo máximo de 15 días.

Sinalar, tamén, que durante o primeiro semestre do ano se beneficiaron do decreto da Xunta de garantía de tempos máximos de acceso ás prestacións sanitarias públicas 31.200 pacientes, 1.167 máis que no primeiro semestre do ano anterior (preto do 4 % de incremento), e máis dun 42 % respecto de 2018 (21.880), ano no que entrou en vigor esta norma.

No que se refire ás intervencións cirúrxicas baixo o amparo do decreto de garantía de tempos máximos, no primeiro semestre do ano realizáronse 6.323 intervencións, é dicir un 11,9 % máis que no mesmo período do ano anterior.

Desde a entrada en vigor deste decreto do Executivo galego beneficiáronse 370.688 pacientes e non se derivaron doentes a centros concertados ou privados.

Cómpre lembrar que a peche de 2024, o tempo de espera media para unha intervención cirúrxica en España era de 126 días e de 105 días para a consulta co especialista.