Santiago de Compostela, 30 de outubro de 2025

O Diario Oficial de Galicia (DOG) publica, na súa edición de hoxe, as resolucións da Dirección Xeral de Recursos Humanos do Servizo Galego de Saúde polas que se dan a coñecer os aspirantes definitivamente seleccionados no concurso-oposición nas categorías de celador, grupo auxiliar da función administrativa, persoal de servizos xerais e técnico en coidados auxiliares de enfermería, e no proceso selectivo de estabilización, polo sistema de concurso de méritos, para o ingreso nas categorías de celador e grupo auxiliar da función administrativa, procesos selectivos convocados polas correspondentes resolucións do 14 e 15 de decembro e do 26 e 28 de decembro de 2022.

Este sería o segundo proceso de elección de destino nestes dous procesos selectivos nas categorías de celador, grupo auxiliar da función administrativa, persoal de servizos xerais e técnico en coidados auxiliares de enfermería, tras resultar prazas vacantes logo das resolucións de nomeamentos do 26 de maio e do 9 de xuño. 

Neste segundo proceso de elección de destino ofertáronse as prazas que resultaron vacantes aos novos aspirantes segundo a orde de prelación, tal e como está establecido nas resolucións das convocatorias co fin de asegurar a cobertura da totalidade das prazas ofertadas.

Nos procesos selectivos de estabilización, polo sistema de concurso de méritos, convocado polas resolucións do 26 e 28 de decembro de 2022, resultan definitivamente seleccionadas 47 novos aspirantes, dos cales 32 corresponden á categoría de celador e 15 ao grupo auxiliar da función administrativa.

Nos procesos selectivos, polo sistema de concurso-oposición, convocados polas resolucións do 14 e 15 de decembro de 2022, resultan novos seleccionados un total de 147 aspirantes. Da totalidade dos seleccionados, 16 corresponden á categoría de celador, 70 ao grupo auxiliar da función administrativa, 34 a persoal de servizos xerais e 27 á de técnicos en coidados auxiliares de enfermería.

O número de prazas ofertadas por categoría concorda coas novas persoas seleccionadas.

Coa publicación destas resolucións, ábrese un prazo de dez días hábiles contados a partir do día seguinte ao da publicación desta resolución (do 31 de outubro ao 13 de novembro de 2025) para que os novos aspirantes definitivamente seleccionados no concurso-oposición e no concurso de méritos seleccionen telematicamente, a través do sistema de información Fides/expedient-e, os destinos ofertados por orde de prelación entre a relación de prazas ofertadas.

Procedemento de elección de destino

A elección de destino realizarase a través do sistema de información Fides/expedient-e, conforme ás bases de procedemento publicadas no Diario Oficial de Galicia do 5 de xuño de 2020. A aplicación informática fará visibles todas e cada unha das prazas que se ofertan na respectiva categoría e facilitará información ao aspirante da posición e orde de prelación que ocupa no proceso, a efectos de elección de destino, segundo a quenda de participación e puntuación acadada nel.

A selección de destinos efectuarase por orde de preferencia e requirirá a sinatura electrónica e presentación por rexistro electrónico.

O aspirante disporá das mesmas opcións que no acto presencial. Así, a aplicación permitirá a renuncia á participación na elección de destino e mesmo a elección dun número de prazas inferior ao da posición que ocupa no proceso.

Finalizado o prazo para a selección de destinos, o sistema de información efectuará a adxudicación automática, en función da quenda e orde de prelación acadada por cada aspirante no proceso e atendendo á orde de preferencia na selección de destinos efectuada por este.

Este procedemento telemático redunda nunha maior axilidade e simplificación dos procesos selectivos e supón un avance no dereito dos cidadáns de relacionarse electronicamente coas Administracións Públicas. Asegúrase a continuidade asistencial e o normal funcionamento dos centros sanitarios e evita o desprazamento dos aspirantes á sede do órgano convocante como acontecía coa modalidade presencial.

Os aspirantes seleccionados poden dirixir todas as dúbidas e consultas relacionadas con estes dous procesos selectivos ao enderezo de correo electrónico: oposicions@sergas.es.