Santiago de Compostela, 10 de novembro de 2025

A Xunta publica hoxe no Diario Oficial de Galicia o anuncio polo que se somete ao trámite de información pública o proxecto para executar unha senda peonil e ciclista na estrada PO-313, no treito que comunica Cadro e  Cadrelo, no concellos de Marín, que suporá un investimento estimado de máis de 712.000 euros.

O prazo para presentar alegacións a este proxecto será de 30 días hábiles contados a partir de mañá. No DOG pode ampliarse a información.

O obxectivo da Xunta é poder aprobar o proxecto e realizar a convocatoria de levantamento de actas previas das expropiacións no primeiro semestre do vindeiro ano, para  licitar as obras para a súa execución tamén no 2026.

A intervención que se somete a información pública consiste na execución dun novo itinerario entre os puntos quilométricos 4+120 e 5+035, incluíndo as actuacións complementarias necesarias, nas que se inclúe a execución de elementos de drenaxe e estruturas de contención e sostemento de noiros; dentro do termo municipal de Marín.

Este novo itinerario, que se desenvolverá pola marxe esquerda da citada estrada autonómica, suma unha lonxitude de algo máis de 900 metros.

O departamento de Infraestruturas da Xunta propón realizar a nova senda cun ancho de entre 1,80 metros e os 2,22 metros (2 metros de senda e 22 centímetros de bordo), reducíndose os mínimo permitido onde sexa necesario para evitar afectar a construcións existentes: muros, galpóns ou peches.

No que respecta aos carrís de circulación, manteranse cun ancho de 3,50 m, con beiravías entre 0,5 e 1,1 m, ampliándose este en zonas puntuais ata os 1,1 m, onde a traza así o permita.

Ademais, como consecuencia da execución da senda peonil e ciclista, será preciso executar obras complementarias en que será necesario repoñer o paquete de firme completo da PO-313.

Proxéctase tamén un sistema de evacuación das augas de escorrenta superficial conformado por unha rede de tubaxes e sumidoiros, que verterán os caudais recollidos cara aos puntos de vertedura existentes.

Así mesmo, levaranse a cabo diferentes obras complementarias no treito de actuación, necesarias para garantir a funcionalidade da senda como, a habilitación dunha parada de autobús na contorna do punto quilométrico 0+700, ou a execución de varios treitos de varanda urbana ao longo do percorrido da senda peonil e ciclista.

As actuacións contempladas no proxecto aprobado hoxe de xeito provisional contarán con financiamento europeo a través do programa operativo FEDER 21/27. O prazo de execución das obras é de 12 meses.

Con esta nova senda na PO-313, o Goberno galego ten como obxectivo mellorar a seguridade viaria e contribuír á consolidación dunha rede de mobilidade sostible e integrada no contorno, dando continuidade funcional e formal ás sendas xa executadas de Coirados – Pardavila e Pardavila – Cadro, con financiamento dos programas FEDER 14/20 e FEDER React.