Santiago de Compostela, 11 de novembro de 2025

O presidente da Xunta, Alfonso Rueda, informou de que o Consello aprobou hoxe o proxecto de Lei de modificación da Lei de saúde de Galicia, que suporá a posta en marcha de novas medidas para reforzar a protección dos traballadores da sanidade pública e privada ante calquera agresión. “A Xunta terá tolerancia cero coas condutas violentas que poñan en risco a integración do persoal nos centros sanitarios”, indicou.

“Queremos poñer os medios e recursos para previr e atallar todo acto violento contra as persoas que coidan e velan pola nosa saúde”, engadiu o conselleiro de Sanidade, Antonio Gómez Caamaño, quen lembrou que para iso é preciso adaptar a actual normativa -do ano 2008- á realidade actual.

Entre as principais novidades, segundo explicou Rueda, está que “Galicia se converterá na primeira comunidade en considerar sancións por agredir técnicos de emerxencias ou do 061”. Así se comprometera a Consellería de Sanidade ante as asociacións que representan a estes traballadores, que teñen un alto nivel de exposición ao risco de agresións.

Ademais, a definición de profesional de ámbito sanitario tamén se amplía a persoal con outras funcións como a inspección de servizos sanitarios ou persoal das áreas de admisión e administración dos centros sanitarios.

Como resposta a novas formas de violencia, Rueda resaltou que a futura lei incluirá a violencia dixital exercida por pacientes, familiares ou acompañantes contra profesionais da sanidade, ademais da violencia física e verbal. O concepto esténdese para aplicarse a agresións fóra dos recintos sanitarios con ocasión das funcións dos seus profesionais e non só durante o seu propio exercicio.

Dentro dos deberes da cidadanía, ademais do xenérico deber de respecto ao persoal que presta os seus servizos no sistema de saúde de Galicia, incorpórase o deber de respecto da súa honra e prestixio profesional. En correlación con ese deber, establécese o seu incumprimento como infracción sanitaria.

A reforma da Lei de saúde inclúe a modificación do capítulo de infraccións e sancións para dar un tratamento específico e distinto para as agresións e demais actitudes violentas, de xeito que se individualicen, tipifiquen e sancionen de maneira individualizada e singularizada de acordo coa súa gravidade.

Máis protección á vítima

Outra das novidades, tal e como explicou o conselleiro, é que nos supostos de infracción grave ou moi grave cometida no ámbito do Sistema público de saúde de Galicia, poderán acordarse sancións accesorias como a asignación á persoa infractora doutro profesional sanitario distinto e/ou a súa adscrición a un centro sanitario distinto da mesma localidade, por un prazo non superior a cinco anos.

Como garantía e medida de protección para o persoal do Sistema público de saúde Galego, vítima de violencia no ámbito sanitario, a nova lei prevé tamén a posibilidade de articular medidas de mobilidade.

Gómez Caamaño tamén indicou que o proxecto de lei “regula as gravacións sen consentimento en consultas”, unha práctica que se considerará “unha quebra da confianza e que pode levar a que o profesional suspenda a asistencia”, deixando constancia diso na historia clínica, quedando garantida, en todo caso, a atención sanitaria do usuario.

No mesmo sentido, o Servizo Galego de Saúde prestará apoio psicolóxico ao persoal agredido da sanidade pública. Cando así o precise, a Asesoría Xurídica da Xunta facilitará asesoramento legal sobre as accións e denuncias que caiba interpoñer.

O proxecto de Lei de modificación da Lei de saúde aprobado hoxe polo Consello da Xunta fai fincapé na prevención e introduce medidas de formación específica como a realización de actividades conxuntas con interlocutores policiais e sanitarios. Aínda que xa se están realizando formacións nos distintos centros de traballo, incrementarase con novas actividades como un curso en liña para autoformación.

Engádese un artigo relativo ao Plan galego de prevención contra a violencia no ámbito sanitario, que será o instrumento que garanta o dereito de todos os profesionais a recibir asistencia e protección das administracións públicas e servizos de saúde no exercicio da súa profesión ou no desempeño das súas funcións. Será de aplicación en todos os centros asistenciais da sanidade pública e incluirá, entre outras cousas, medidas organizativas dirixidas a evitar as situacións de violencia no ámbito sanitario e atenuar os seus efectos.

Para avaliar a situación, créase o Rexistro galego de actos de violencia externa no ámbito sanitario, no cal se inscribirán todos os actos de violencia que resultasen sancionados.

Estas modificacións legais buscan ante todo previr actos de violencia externa que poidan sufrir os traballadores da sanidade pública que teñen como labor coidar da cidadanía. Para a súa redacción, a Consellería de Sanidade tivo en conta numerosas achegas de profesionais, asociacións e representantes dos traballadores.

O texto será agora remitido ao Parlamento para a súa tramitación e aprobación parlamentaria e entrará en vigor o día seguinte ao da súa publicación no Diario Oficial de Galicia.