As Neves (Pontevedra), 21 de novembro de 2025

O delegado territorial da Xunta en Pontevedra, Agustín Reguera, visitou esta mañá o concello das Neves onde a Xunta vai realizar unha obra de mellora do acceso á zona de Setados.

Así, hoxe saíu a licitación esta obra que conta cun orzamento total (incluíndo expropiacións) de preto de 500.000 euros e á que as empresas poden presentarse ata o día 17 de decembro.

O obxectivo, segundo explicou o delegado territorial, é mellorar a seguridade desta zona e permitir unha circulación viaria máis confortable para todos os veciños e veciñas. Para elo, mellorarase a trazada e o cruce propiamente dito, ademais de crear un carril central que permita facer o xiro con seguridade. O proxecto tamén inclúe un desvío para comunicar a vía municipal coa PO 400.

Reguera aproveitou a visita para lembrar o compromiso da Xunta coa “mellora e mantemento das vía de titularidade autonómica” e destacou a seguridade como “unha das prioridades á hora de realizar investimentos tan importantes como o que se vai realizar no concello das Neves”.

As obras, que arrancarán probablemente no primeiro semestre do ano 2026, contan cun prazo de execución de seis meses.