Toledo, 21 de novembro de 2025

A Consellería de Sanidade, por medio da Dirección Xeral de Saúde Pública, participa como protagonista nunha mesa redonda sobre políticas e prevención da obesidade, no marco dunhas Xornadas de Actualización en Obesidade organizadas pola Sociedade Española para o Estudo da Obesidade.

A subdirectora xeral de Estilos de Vida Saudable, Sagrario Pérez, foi seleccionada como experta galega nunha mesa redonda do proxecto MAPPS II, actuando como portavoz do grupo encargado de analizar e propoñer respostas desde a perspectiva local e comunitaria.

A Federación Mundial da Obesidade lanzou MAPPS II, unha iniciativa global para fortalecer a prevención, o tratamento e o manexo da obesidade, apoiando aos actores nacionais na xeración de evidencia, construción de coalicións e participación en diálogos políticos. O enfoque tamén inclúe investigar os determinantes sociais e comerciais da saúde e as desigualdades nas vías de atención da obesidade.

O proxecto MAPPS sitúa España entre os seis países piloto a nivel europeo para analizar como os sistemas de saúde, as políticas públicas e a colaboración social poden mellorar a prevención, tratamento e manexo da obesidade, prestando especial atención á equidade, a transformación dos determinantes sociais e comerciais, e á inclusión das persoas con experiencia vivida.

A invitación responde ao compromiso da Xunta na busca de solucións innovadoras fronte á obesidade.

Referentes nacionais

A mesa redonda, celebrada no Palacio de Congresos de Toledo e coordinada pola World Obesity Federation, reuniu vinte referentes nacionais no ámbito clínico, investigador, social e político.

Durante a xornada, a portavoz galega achegou a visión da comunidade e destacou a importancia das alianzas multisectoriais, do enfoque estrutural e da translación dos aprendizaxes do proxecto MAPPS ás estratexias autonómicas, como o Plan Obesidade Zero.

Subliñou que o traballo en rede, a avaliación continua e a participación activa de concellos, escolas e empresas son elementos clave para avanzar cara a respostas máis xustas, operativas e sostibles no control da obesidade.

A mesa redonda culminou cun debate aberto no que se identificaron barreiras e recomendacións para as políticas futuras, incidindo no valor de sumar recursos, experiencia comunitaria e evidencia científica para maximizar o impacto das accións de saúde pública fronte á obesidade.