Ourense, 26 de novembro de 2025

A directora xeral de FP, Eugenia Pérez, acompañou hoxe a un grupo de docentes de centros de FP de Barcelona, Alicante e Milán na súa visita ao Centro Galego da Innovación da FP Eduardo Barreiros, onde coñeceron os proxectos máis punteiros que se desenvolven nas súas instalacións. En concreto os profesores proceden do Centro Público de Formación Profesional Integrada Institut dels Aliments (Barcelona), do Centro Integrado Público de Formación Profesional Canastell (Alicante) e da di Ospitalità e Turismo Carlo Porta Milano (Milán). 

A visita forma parte dun programa observación laboral entre centros de FP de Hostalería e Turismo e Industrias Alimentarias e impulsouna o Centro Integrado de FP Carlos Oroza, de Pontevedra, que tamén participou.

No transcurso do seu percorrido polo Eduardo Barreiros, os profesores interesáronse pola organización e metodoloxías de traballo do centro, así como polos proxectos vinculados á I+D+i, con especial interese nos desenvolvidos na área de Gastronomía Multisensorial, en concreto no proxecto de Enogastronomía 5.0., de deseño de experiencias gastronómicas inmersivas e multisensoriais de alto valor engadido.

Amosáronselle, así mesmo, as iniciativas de innovación e investigación que se están realizar nos eidos da biotecnoloxía aplicada, da industria 5.0, da fabricación aditiva, da enerxía e a sostibilidade ambiental e da realidade estendida aplicada. Ademais, no espazo de emprendemento industrial coñeceron Netclean, un sistema autosuficiente para a xestión de fosas sépticas en contornos rurais que está xa rexistrado como modelo de utilidade, que é a primeira patente do Eduardo Barreiros.

Nos seus tres anos de traxectoria o Centro Galego da Innovación da FP recibiu a visita de máis de 2.000 persoas de centros educativos, institucións e empresas referentes dos sectores produtivos, procedentes de diferentes puntos da xeografía española e de países como Lituania, Turquía, Reino Unido ou Portugal.