Santiago de Compostela, 27 de novembro de 2025

A directora xeral de Recursos Económicos do Servizo Galego de Saúde, Amparo Pousada, destacou esta mañá no Parlamento de Galicia que a área sanitaria de Santiago e Barbanza xa tramitou preto de 87.000 facturas no que vai de ano 2025.

Segundo explicou na Comisión 5ª de Sanidade, Política Social e Emprego, durante o ano 2025 a área sanitaria compostelá cumpriu mensualmente co período medio de pagamento, que no mes de novembro, rexistraba unha media de 28,3 días. “Este é un dato dinámico e vai variando cada día ata o peche do mes, en función das facturas que se van tramitando”, lembrou a directora.

Segundo a normativa actual, o prazo máximo legal para o pagamento está establecido en 60 días desde a data de rexistro da factura polo provedor. Así, a Administración ten a obriga de satisfacer o importe dentro dos 30 días seguintes á data de aprobación e conformidade dos bens e servizos prestados e, esa conformidade, deberá producirse dentro dun prazo máximo de 30 días naturais desde a entrega do ben e a presentación da factura.

Durante o ano 2024, a área sanitaria compostelá tramitou un total de 92.039 facturas.

Na súa intervención, a directora xeral incidiu en que o Servizo Galego de Saúde segue a traballar para tramitar coa maior axilidade posible as facturas dos provedores e así dar cumprimento ás disposicións legais relativas aos prazos de pagamento. Ademais, destacou que o último de fiscalización da conta xeral do Sergas recoñece un avance significativo no seguimento da facturación dos centros e no control do período medio de pago coa emisión de informes periódicos.

Na mesma liña, puxo en valor o esforzo de xestión realizado polas áreas sanitarias e a redución do importe dos xuros abonados por demora no pagamento de facturas que, en 2025, case se reduciu á metade en comparación co pasado ano.

Entre os pagamentos da área sanitaria de Santiago de Compostela e Barbanza remarcou que a xerencia destina unha partida de 254 millóns de euros ao seu capítulo de gasto, entre os que se encontra, por exemplo, a subministración de produtos alimenticios.

Precisou que os catro hospitais de Santiago poden servir un total de 1.290.253 servizos (almorzos, xantares, merendas e ceas, máis colacións de inxestas especiais), sendo a media diaria de 3.535 servizos.