Santiago de Compostela, 30 de novembro de 2025

A Xunta de Galicia reclama ao Goberno central que defenda unha maior asignación dentro da cota que o ICCAT concede á Unión Europea para as distintas especies altamente migratorias. A Consellería do Mar considera que o Estado debe aproveitar o contexto actual, no que se produciron incrementos significativos dalgúns TACs, para garantir unha repartición interna que responda ás necesidades reais da frota galega. Así se desprende do informe elaborado pola Dirección Xeral de Pesca, Acuicultura e Innovación Tecnolóxica tras a celebración da 29ª reunión ordinaria do ICCAT en Sevilla, onde Galicia participou activamente formulando propostas e defendendo os intereses do sector.

Durante a xuntanza, Galicia logrou evitar que prosperase unha emenda presentada por unha ONG que pretendía impoñer o uso obrigatorio de dispositivos de protección contra aves mariñas nos palangres. A Consellería do Mar, xunto co sector, trasladou á UE argumentos técnicos que demostraron que estes dispositivos non sempre funcionan correctamente, poden perderse e xerar contaminación mariña, supoñen un custo adicional, e carecen dun respaldo institucional sólido. Finalmente, a proposta foi retirada grazas á presión exercida pola delegación galega.

Do mesmo xeito, Galicia defendeu a importancia de non crear novas modalidades de palangre de superficie, cuestión que tamén se debateu no ICCAT. Introducir unha nova arte obrigaría a unha recodificación completa, xeraría problemas aduaneiros e de control sanitario e encarecería a operativa diaria dos buques, dado que a maioría do peixe espada chega conxelado a España. A posición galega foi asumida pola UE, protexendo así a estabilidade operativa dunha das pesqueiras clave para o sector.

A Xunta advertiu tamén do profundo desfase existente entre a realidade pesqueira e os datos científicos dispoñibles sobre o marraxo dientuso, especie que non se avalía desde 2017. A ausencia desta avaliación implica que poderían non existir posibilidades de pesca ata 2030, deixando o sector sen opcións reais de actividade. Por iso, Galicia pide ao Goberno central que lidere a petición formal ante o ICCAT para que se realice a avaliación en 2026 e se dispoña de información actualizada e rigorosa. Ante a insistencia de Galicia, desde a Secretaría Xeral de Pesca do Ministerio comprometéronse a buscarlle unha solución inmediata á situación.

Defensa galega da quenlla

Outra das cuestións destacadas é a situación da quenlla (tintorera). Galicia lembra que na cimeira do ICCAT celebrada en Exipto tivo un papel determinante para evitar a redución prevista e conseguir manter o TAC en 30.000 toneladas, fronte ás 27.500 t que pretendía Reino Unido, o que supuxo un incremento efectivo de 2.500 t respecto á proposta inicial. Este volume garante a continuidade da actividade da frota galega e recoñece o bo estado da especie no Atlántico Norte.

Bonito do norte e peixe espada

Galicia destaca ademais que o ICCAT mantén sen cambios o TAC do bonito do norte e o do peixe espada do Atlántico Norte, dúas das especies máis relevantes para as artes de cacea e palangre galegas. Este mantemento garante estabilidade na planificación da campaña e nas expectativas comerciais da frota, reforzando a necesidade dunha repartición interna xusta por parte do Goberno central.