Santiago de Compostela, 10 de decembro de 2025

O director xeral de Planificación e Ordenación Forestal, José Luis Chan, destacou hoxe os beneficios das agrupacións forestais de xestión conxunta para a xestión sostible do monte galego. Puxo en valor este instrumento nunha mesa redonda sobre fórmulas colectivas para a xestión do territorio impulsada polo Laboratorio Ecosocial do Barbanza e a Fundación RIA.

Neste contexto, destacou que o seu obxectivo é promover a rendibilidade silvícola e promover unha boa xestión forestal, sen esquecer os aspectos económicos, ambientais e sociais que teñen os bosques. Recordou que as persoas que formen parte de agrupacións poderán recibir asesoramento técnico especializado e obterán mellores prezos e oportunidades á hora de comercializar a madeira, xa que o farían de xeito conxunto.

Explicou tamén que este tipo de asociacións contribúen de xeito moi positivo na mellora da eficiencia económica dos nosos bosques, ao facilitar o acceso a recursos e subvencións, ao mesmo tempo que promoven prácticas sustentables.

Apoio do Goberno autonómico

Así mesmo, sinalou que a Consellería do Medio Rural leva a cabo un importante traballo para favorecer a creación destas asociacións. Este mesmo mes resolvéronse as achegas destinadas a fomentalas e apoialas, beneficiando a 22 agrupacións cun orzamento de máis de 600.000 euros. De feito, a anterior convocatoria destas achegas permitiu duplicar o número de agrupacións forestais de xestión conxunta.