Santiago de Compostela, 14 de xaneiro de 2026

O conselleiro de Sanidade, Antonio Gómez Caamaño, advertiu hoxe do impacto da nova folga nacional contra o Estatuto Marco convocada para hoxe e mañá e reclamoulle á ministra de Sanidade que asuma a súa responsabilidade, posto que ela creou este problema cunha reforma que xera un gran rexeitamento entre os profesionais.

O titular da carteira sanitaria, acompañado do xerente do Sergas, José Ramón Parada, e do director xeral de Asistencia Sanitaria, Alfredo Silva, mantivo una reunión de traballo de xeito telemático cos xerentes das sete áreas sanitarias, para abordar o impacto da folga de facultativos contra o Estatuto Marco impulsado polo Goberno central.

O conselleiro incidiu na necesidade de que o Ministerio de Sanidade atalle dunha vez por todas a situación e pediulle á ministra que dialogue cos médicos na procura dun acordo.

Neste sentido, remarcou que resulta totalmente incomprensible que o Goberno de España pretenda reformar a norma que regula o traballo do persoal sanitario sen ter en conta as demandas dos profesionais que asumen un maior nivel de responsabilidade no diagnóstico, tratamento e coidado da saúde dos pacientes.

Gómez Caamaño indicou que esta folga obriga a suspender parte da actividade dos hospitais e centros de saúde, afectando, polo tanto, ao desenvolvemento dos servizos asistenciais. En concreto dixo que, na mañá de hoxe, xa se suspenderon 205 intervencións cirúrxicas.

Ademais, o responsable sanitario incidiu en que a folga chega en plena vaga da gripe e das enfermidades respiratorias, cos servizos sanitarios tensionados, como acontece sempre por estas datas.

Gómez Caamaño referiu que, nos catro días de folga médica de decembro contra o Estatuto Marco, suspendéronse preto de 60.000 atencións médicas en Galicia, das que preto de 1.100 cirurxías tiveron que ser reprogramadas case todas nese mes, pero impactando nos tempos de acceso da cidadanía a operacións, probas e consultas.

O conselleiro lembrou que a folga de hoxe acadou un seguimento na sanidade pública galega do 19,99 % na quenda de mañá. En atención primaria o seguimento foi do 5,96 % e nos hospitais do 25,43 %.

Obxectivo do Sergas

Ao igual que na folga nacional de decembro contra o Estatuto Marco, o conselleiro referiu que o obxectivo do Servizo Galego de Saúde garantir a calidade e a seguridade aos pacientes.

Así, ademais da actividade urxente, o departamento sanitario galego quere asegurar a programación das prioridades 1 e os procesos da lei de garantías de tempos máximos. Como en anteriores paros, o Servizo Galego de Saúde fará un esforzo de planificación e reorganización para reprogramar toda a actividade suspendida canto antes