Santiago de Compostela, 30 de xaneiro de 2026

A Xunta publica no Portal de Contratos Públicos a contratación dos servizos de instalación, consultoría, configuración, posta en marcha, mantemento e soporte 3N (preventivo, correctivo e evolutivo) dun sistema de xestión integral dos comités multidisciplinares de tumores do Servizo Galego de Saúde por un importe de 732.050 euros.

Desde hai décadas, nas distintas áreas sanitarias existen grupos de traballo identificados como comités multidisciplinares de tumores, constituídos por diferentes especialidades esenciais na toma de decisións no proceso diagnóstico-terapéutico do paciente oncolóxico, que se reúnen con periodicidade semanal ou bisemanal.

Estes comités naceron ante a necesidade detectada polos clínicos da discusión conxunta de cada caso para optimizar o manexo do paciente oncolóxico e elaborar un plan coordinado, que ofreza non só un tratamento baseado na maior evidencia científica, respectando a individualidade do paciente, senón tamén unha maior seguridade determinando que todos os actores implicados na atención oncolóxica se atopan aliñados e coordinados.

Grazas aos avances da tecnoloxía, o Servizo Galego de Saúde afronta a oportunidade para realizar unha transformación dixital do proceso de xestión dos comités de tumores, e, por extensión, de todo o proceso oncolóxico (desde o diagnóstico ata a alta do paciente).

A implementación dun soporte tecnolóxico adecuado permitirá, entre outras cousas, asegurar a trazabilidade completa do proceso oncolóxico, perfeccionar a coordinación dos aspectos clave do percorrido asistencial do paciente e dispoñer dunha ferramenta que facilite a xestión, coa medición de indicadores relacionados coa actividade operativa do comité e outros relacionados coa actividade clínica.

Trátase, polo tanto, dun sistema de información específico para a xestión integral dos comités multidisciplinares de tumores, con integración de datos clínicos, ferramentas de visualización e xeración de informes, que permita ao Sergas xestionar de forma máis eficiente o labor destes comités.

Este proxecto está financiado pola Unión Europea, a través do Plan de Recuperación, Transformación e Resiliencia.

As empresas interesadas neste contrato teñen de prazo ata o 2 de marzo para presentar as súas ofertas.