Santiago de Compostela, 11 de febreiro de 2026

A Axencia de Doazón de Órganos e Sangue (ADOS) está a ultimar os preparativos dunha nova campaña de doazón de sangue nas instalacións da empresa Stellantis Vigo. Nas xornadas do xoves 12, mércores 18 e xoves 19 de febreiro, ADOS achegarase ata a factoría viguesa co obxectivo de incentivar a participación dos traballadores e traballadoras.

Esta é a primeira visita das catro que a ADOS realizará este ano en Stellantis Vigo e a Axencia quere poñer en valor a contribución desta empresa viguesa que acumula 78.840 doazóns de sangue desde o 5 de xullo de 1995, data da primeira visita ata esta significativa factoría galega. ADOS quere amosar o seu sincero agradecemento a Stellantis Vigo, un dos principais centros de referencia do tecido industrial galego que, desde o inicio da súa andaina, ten amosado o seu compromiso coa sociedade galega e co solidario xesto da doazón, tanto de órganos como de sangue.

Traxectoria solidaria

Hai máis de tres décadas, Stellantis Vigo comezou a acoller campañas de doazón de sangue promovidas desde a Consellería de Sanidade e que, actualmente, consolidan a esta empresa como un referente a nivel estatal, sendo a empresa española con maior número de doazóns de sangue.

Salientar que, grazas á colaboración dos profesionais da empresa viguesa, que teñen doado ao longo destas tres décadas, puideron subministrarse compoñentes sanguíneos para realizar, por exemplo, máis de 39.400 intervencións cirúrxicas ou transfundir plaquetas a 15.800 doentes oncolóxicos.

ADOS quere salientar a constante implicación e compromiso de Stellantis Vigo co desenvolvemento das campañas de doazón de sangue, xa que unha iniciativa destas características, esixe dunha enorme coordinación e colaboración desinteresada de todos e cada un dos departamentos que integran á factoría viguesa, un esforzo que ten que ser posto necesariamente en valor, dada a dificultade de organización que supón unha campaña desta envergadura.

Así mesmo, a Axencia de Doazón de Órganos e Sangue quere agradecer o seu compromiso e colaboración á Dirección de Stellantis Vigo e de todos os departamentos que integran á empresa, facendo, como non podía ser doutro xeito, extensivo este agradecemento a todos os traballadores e traballadoras que doan sangue.