A consellería de Sanidade organiza esta fin de semana dúas novas xornadas extraordinarias para participar no ensaio clínico Sincigal sobre a vacina contra o VRS
Durante esta fin de semana, as persoas que desexen participar no estudo poderán acudir, sen cita, aos hospitais da rede sanitaria pública galega
Durante todo o mes de febreiro continuarán abertos os puntos habilitados de luns a venres nos hospitais e centros de saúde participantes
Este ensaio clínico avalía a redución de ingresos en adultos grazas á vacina fronte ao virus respiratorio sincitial, que xa está autorizada polas autoridades sanitarias
Ata o de agora xa colaboraron no estudo case 49.144 persoas
Os interesados en participar no estudo Sincigal teñen á súa disposición o teléfono gratuíto 900 842 217 para resolver dúbidas
Santiago de Compostela, 20 de febreiro de 2026
A Xunta, a través da Consellería de Sanidade e a Fundación Pública Galega Instituto de Investigación Sanitaria de Santiago, organiza esta fin de semana dúas novas xornadas extraordinarias para participar no ensaio clínico Sincigal, que avalía a redución de ingresos en adultos grazas á vacina fronte ao virus respiratorio sincitial.
Así, esta fin de semana o departamento sanitario da Xunta habilitará de forma extraordinaria os 14 hospitais públicos galegos para facilitar a participación neste ensaio clínico Sincigal, no cal xa colaboraron en total 49.144 persoas.
Aumento da accesibilidade
As xornadas do sábado e do domingo serán a derradeira oportunidade para que calquera persoa maior de 18 anos que desexe participar no ensaio o poida facer acudindo, sen cita previa, aos puntos habilitados no conxunto dos hospitais galego, en horario de mañá e tarde (de 10:00h-14:00h e de 16:00h-20:00h).
|
Centro hospitalario |
Punto de participación |
|
Hospital Universitario da Coruña |
Na 4ª planta, consultas externas |
|
Hospital Virxe da Xunqueira |
Consultas externas |
|
Hospital Arquitecto Marcide |
Laboratorio |
|
Hospital da Público da Mariña |
Punto vacinación |
|
Hospital Lucus Augusti (HULA) |
Na 4ª planta |
|
Hospital Público de Monforte de Lemos |
Planta baixa entrada zona aparcadoiro |
|
Hospital do Barco de Valdeorras |
Biblioteca |
|
Complexo Hospitalario Universitario de Ourense (CHUO) |
Planta 0 do Novo Edificio de hospitalización |
|
Hospital Público de Verín |
Salón de actos |
|
Hospital de día do Hospital Provincial de Pontevedra |
(Entrada por Consultas Externas, parte traseira do hospital) |
|
Hospital Público do Salnés |
Planta -1 Consulta Medicina Preventiva |
|
Hospital do Barbanza |
Salón de actos |
|
Complexo Hospitalario de Santiago de Compostela |
Sala de toma de mostras (andar -3) |
|
Hospital Álvaro Cunqueiro |
Planta 0, zona de docencia |
Ademais, durante todo o mes de febreiro continuarán abertos os puntos habilitados de luns a venres nos hospitais e centros de saúde participantes.
As persoas interesadas en participar neste estudo teñen á súa disposición o teléfono gratuíto 900 842 217 e a web do proxecto sincigal.com para resolver dúbidas.
A Consellería de Sanidade e a Fundación Pública Galega Instituto de Investigación Sanitaria de Santiago buscan evidencia científica que sirva para valorar a eficiencia da vacina fronte ao virus respiratorio sincitial en adultos, como xa se logrou co estudo Galflu, que serviu para incluír na sanidade pública a vacina de alta carga fronte á gripe para maiores de 70 anos.
