A Xera destaca o emprego da madeira nas estruturas glamping para unha mellor integración en contornas naturais e rurais
O director da Axencia Galega da Industria Forestal (Xera), Alfredo Fernández Ríos, participou esta tarde na clausura da formación impartida pola Escola de Enxeñaría Forestal de Pontevedra
Salienta o apoio que a Xera ofrece ás actividades de formación e divulgación da industria forestal-madeira no marco da liña de apoios Xera-Savia
Pontevedra, 27 de febreiro de 2026
O emprego de madeira en estruturas glamping logra unha mellor integración en contornas naturais e rurais, á vez que dota ás construcións dun alto grao de confort térmico e acústico. Así o destacou o director da Axencia Galega da Industria Forestal (Xera), Alfredo Fernández Ríos, na clausura do curso sobre construción de estruturas de madeira para glamping, impartido na Escola de Enxeñaría Forestal de Pontevedra da Universidade de Vigo.
Fernández Ríos fixo fincapé no apoio que a Xera ofrece no marco da liña de apoios Xera-Savia ás actividades de formación e divulgación da industria forestal-madeira para mellorar as habilidades profesionais e, así, incrementar a competitividade e o coñecemento en todas as fases da cadea de valor.
O responsable da Xera celebrou a gran acollida do curso entre os profesionais, cubrindo o total das 30 prazas dispoñibles, e sinalou que a Escola de Enxeñaría Forestal da Universidade de Vigo foi beneficiaria das axudas Xera-Savia para a organización de actividades formativas non regradas que impulsen o coñecemento e a competitividade da industria forestal-madeira.
A actividade formativa “Construción de estruturas de madeira para glamping básico”, afirmou, permite formar profesionais para dar solucións aos retos da industria da madeira nun ámbito concreto da madeira estrutural, afondar nas novas tendencias como material idóneo para este tipo de construcións, así como favorecer a mellora das competencias do talento humano e a súa adaptación aos novos desafíos a nivel global.
Imaxes relacionadas
