Santiago de Compostela, 11 de marzo de 2026

O conselleiro de Sanidade, Antonio Gómez Caamaño, sinalou no Pleno do Parlamento que a Xunta impulsará as actuacións que sexan necesarias a curto e medio prazo conforme o criterio dos técnicos que hoxe pola mañá visitaron o centro de saúde do municipio coruñés de Carral.

Así, o conselleiro reiterou que cando o seu departamento teña avaliada toda a información da visita que hoxe realizaron os técnicos, Sanidade tomará as decisións oportunas de cara a mellorar a atención sanitaria neste concello, incluíndo a planificación da construción dun novo centro de saúde se a situación así o require.

Na súa intervención no Pazo do Hórreo, o titular da carteira sanitaria incidiu en que, a partir desa análise técnica, poderanse determinar as intervencións a levar a cabo, que desenvolveranse mediante un convenio de colaboración entre a Xunta e o Concello de Carral.

Gómez Caamaño garantiu unha atención de calidade á veciñanza de Carral e sinalou que máis do 75 % da poboación deste centro de saúde recibe atención, no caso dunha cita ordinaria, en menos de catro días.

Tamén puxo en valor o conselleiro que o centro conta cos recursos suficientes para atender a demanda asistencial e o incremento poboacional, xa que dispón de catro médicos de familia cunha media de 1.295 tarxetas sanitarias, catro profesionais de enfermería, un pediatra, unha matrona e un traballador social, ademais de persoal administrativo e médicos internos residentes en formación.

Polo tanto, -trasladou o titular de Sanidade- a atención sanitaria aos veciños do concello está garantida as 24 horas do día a través dos distintos dispositivos asistenciais da atención primaria.

Mellora, renovación e acondicionamento

O máximo responsable do Servizo Galego de Saúde dixo que a Xunta leva anos investindo na mellora, renovación e acondicionamento dos centros de saúde, tanto os que son da súa titularidade como os que son municipais. En concreto, desde o ano 2009, foron 138 os centros de saúde construídos e reformados en toda Galicia, cun investimento da Xunta de 162 millóns de euros. De xeito desagregado, 52 centros de saúde foron construídos, 27 reformados e 59 centros municipais nos que se levaron a cabo obras co-financiadas pola Xunta.

O conselleiro explicou que a Xunta incluíu no Fondo de Cooperación Local unha previsión específica para compensar aos concellos polos custos de mantemento dos centros de titularidade municipal como é o caso do de Carral, que recibiu en 2025 máis de 22.500 euros para este fin.

A colaboración da Xunta non remata neste investimento, posto que tamén realizou, desde o ano 2021, distintas actuacións de mantemento no propio centro por valor de ao redor de 23.000 euros. 

Entre esas melloras Gómez Caamaño citou, entre outras, a reforma e o traslado da área administrativa para incrementar o espazo e a confortabilidade, a instalación centralizada de osíxeno e a adaptación de espazos para consultas.

Así mesmo, dixo que o Sergas ten previsto en próximas datas levar a cabo o pintado exterior do edificio.