Santiago de Compostela, 17 de marzo de 2026

O Servizo Galego de Saúde asinou hoxe coas organizacións sindicais da Mesa Sectorial un novo Pacto sobre selección de persoal estatutario temporal do sistema público de saúde de Galicia.

Esta sinatura do novo pacto prodúcese logo do acordo unánime coas organizacións sindicais presentes na Mesa Sectorial de Sanidade (CIG, CSIF, CCOO e UGT), permitindo avanzar na consolidación dos dereitos do persoal temporal do Servizo Galego de Saúde, en aspectos tan destacados como a conciliación da vida laboral e familiar, a protección da maternidade, a transparencia e publicidade dos criterios de xestión ou na selección de persoal licenciado sanitario.

Como principal novidade, o pacto incorpora a posibilidade de ofertar contratacións por medios telemáticos. Ata agora só existía o chamamento telefónico. Isto levará aparellado un importante desenvolvemento técnico, cuns prazos progresivos de entrada en funcionamento.

Esta novidade dotará o proceso de contratación temporal dunha maior axilidade e celeridade, buscando acadar unha pronta resposta ás necesidades asistenciais que xurdan, ao tempo que se consegue unha maior comodidade para os aspirantes.

Cómpre destacar que no ano 2025 había 97.830 profesionais inscritos no sistema de listaxes, dos cales 14.605 eran novas inscricións respecto do ciclo anual anterior. Formalizáronse no Servizo Galego de Saúde durante o pasado ano 279.303 contratos.

Con esta sinatura do novo pacto, a Administración procederá a iniciar as actuacións precisas para a aprobación, a súa publicación e posterior entrada en vigor.