Santiago de Compostela, 18 de marzo de 2026

A Consellería de Sanidade vén de pór en marcha o novo modelo de tarxeta sanitaria virtual que poderá ser empregada nos centros sanitarios e nas farmacias de todo o territorio nacional.

A medida dá cumprimento ao Real Decreto 922/2024 e permite o uso desta credencial en calquera punto do territorio nacional sendo interoperable en todo o Estado.

A nova tarxeta, que xa está dispoñible para os usuarios do Servizo Galego de Saúde a través da aplicación Sergas Móbil, caracterízase principalmente por presentar un código QR. Este elemento facilita a súa interoperabilidade en toda España, garantindo que o cidadán poida ser identificado correctamente en calquera servizo de saúde do territorio nacional.

Ademais da funcionalidade técnica, o novo modelo presenta unha representación gráfica renovada, máis aliñada co deseño da tarxeta física actual e que facilita a súa identificación visual por parte dos profesionais e usuarios.

Unha ferramenta equivalente á tarxeta física

O usuario poderá dispoñer a partir de agora da súa tarxeta sanitaria almacenada directamente no seu teléfono móbil. Desde a Consellería de Sanidade lémbrase que esta versión virtual é totalmente equivalente á tarxeta física.

Grazas a esta validez, os cidadáns poderán efectuar todas as xestións que precisen dentro do Servizo Galego de Saúde. Así mesmo, a tarxeta virtual será operativa para o acceso á prestación farmacéutica, permitindo a retirada de medicación nas farmacias de toda España dun xeito áxil e seguro.