Santiago de Compostela, 24 de marzo de 2026

A Xunta de Galicia destinará máis de tres millóns de euros ata mediados do ano 2029 no programa de promoción e apoio ao acollemento familiar especializado con dedicación exclusiva de nenos, nenas e adolescentes en situación de desprotección. O Diario Oficial de Galicia (DOG) publica hoxe a convocatoria do concerto social para a asignación desta iniciativa pioneira que a Xunta puxo en marcha fai tres anos e que nestes momentos desenvolve Aldeas Infantiles.

Esta modalidade de acollemento está pensada para menores do sistema de protección autonómico que, polas súas circunstancias e necesidades, non poden permanecer nos seus fogares cos seus proxenitores. Son nenas, nenos e adolescentes que precisan dunha atención especial, de plena dispoñibilidade e estar integrados nun fogar para garantir un entorno afectivo e social que posibilite en maior medida o seu axeitado desenvolvemento tanto físico como emocional.

Neste tipo de acollemento, a garda exércese na vivenda dunha familia e ten o matiz de especializado porque algún dos membros debe dispoñer da cualificación, da experiencia profesional ou da formación específica para desenvolver este labor. Ademais, o desempeño desta función realízase con dedicación exclusiva por parte da persoa acolledora, polo que resulta incompatible con outra actividade laboral.

Así mesmo, pola dedicación exclusiva que implica este programa, a familia recibirá unha compensación económica de 1.500 euros ao mes. Tamén se cubrirán os gastos básicos e de manutención do menor, ao igual que sucede co resto de familias acolledoras.

A entidade á que se lle asigne este concerto social será a encargada de seleccionar as familias acolledoras, de formalas e de apoialas en todo o que necesiten, así como de facer un seguimento do acollemento. As solicitudes de participación nesta convocatoria deberán presentarse obrigatoriamente por medios electrónicos, a través do formulario dispoñible na sede electrónica da Xunta de Galicia. O prazo para presentar as propostas é dun mes, contado a partir de mañá.

Esta iniciativa está cofinanciada pola Unión Europea (UE) no marco do Programa FSE+ Galicia 2021-2027.