Santiago de Compostela, 8 de abril de 2026

O director xeral de Asistencia Sanitaria do Servizo Galego de Saúde, Alfredo Silva, destacou hoxe á farmacia hospitalaria galega como un dos piares estratéxicos na atención sanitaria e puxo en valor o seu papel cada vez máis relevante ante a forte aposta que está a facer a Xunta pola innovación terapéutica.

O director xeral de Asistencia Sanitaria do Servizo Galego de Saúde, Alfredo Silva, interveu na inauguración da xornada A farmacia hospitalaria galega como motor do cambio: Impulsando a innovación real.

Para o representante do Sergas, a farmacia hospitalaria é clave na eficacia e seguridade do medicamento, e cada vez está máis presente na atención directa aos pacientes, integrada nos equipos clínicos e na toma de decisións asistenciais.

Segundo Alfredo Silva, o departamento sanitario galego está a dar pasos firmes no impulso dun modelo de prestación farmacéutica preventiva, proactiva e resolutiva, centrada nos resultados en saúde e na toma de decisións baseada en datos.

Mellora da eficiencia e acceso a terapias innovadoras

Como exemplo das medidas destacou o papel da Comisión Autonómica Central de Farmacia e Terapéutica, o impulso á avaliación de indicadores ou o avance na robotización e automatización dos servizos de farmacia. Neste senso, incidiu que, no pasado ano, a Xunta investiu preto de 3,4 millóns de euros en sistemas e equipamento destes servizos, o que posibilitou mellorar a eficiencia, a trazabilidade e liberar recursos para unha maior actividade clínica.

Engadido ao anterior, o director xeral destacou os programas que poñen ao paciente no centro do sistema ou iniciativas que garanten a continuidade dos tratamentos.

Tamén destacou o avance de Galicia no acceso a terapias innovadoras como as CAR-T, para o que conta xa con tres hospitais (Santiago de Compostela, A Coruña e Vigo) que poden administrar estas terapias en pacientes adultos.

Para finalizar a súa intervención, o directivo do Sergas trasladou o seu recoñecemento a todos os profesionais dos servizos de farmacia hospitalaria de Galicia, polo seu traballo rigoroso e cada vez máis decisivo na atención aos pacientes, e cuxo papel resulta clave no sistema sanitario.