O presidente da Xunta participou esta mañá na toma de posesión da nova reitora da USC
Rueda aposta por seguir impulsando unha universidade pública galega forte como motor de progreso da comunidade
Felicita a Rosa Crujeiras e destaca a importancia de que sexa a primeira muller en presidir esta institución e agradeceu o traballo do exreitor, Antonio López, e todo o seu equipo
Destaca que o sistema universitario galego é o máis accesible de España, grazas á matrícula gratuíta e ás taxas conxeladas durante 15 anos
Recorda o compromiso da Xunta co financiamento das universidades, e avanza que en breve se comezará a deseñar un novo plan financeiro
Aposta por seguir impulsando a investigación, a innovación e a transferencia de coñecemento
Santiago de Compostela, 10 de abril de 2026
O presidente da Xunta, Alfonso Rueda, defendeu hoxe a necesidade de impulsar unha universidade pública galega forte, moderna e eficiente co obxectivo de que siga sendo, como ata o de agora, un motor de progreso da comunidade autónoma. “Todos queremos o mesmo: que ás universidades lles vaia ben para que a Galicia lle vaia ben”, sinalou.
Así se referiu esta mañá, acompañado polo conselleiro de Educación, Ciencia, Universidades e FP, Román Rodríguez, durante a toma de posesión da nova reitora da USC, Rosa Crujeiras, a quen felicitou no seu acceso ao cargo e destacou a importancia de que sexa a primeira muller en presidir esta institución; “creo que todos e todas agardamos que non sexa a última”, apuntou. Ademais, tamén agradeceu o traballo do exreitor, Antonio López, xa que “foi sempre un negociador esixente, moi coñecedor do que tiña entre mans, pero tamén con moita lealdade”, así como a todo o seu equipo.
Neste sentido, Rueda expresou o seu desexo de que “continúe esta colaboración non só coa Xunta de Galicia, senón tamén entre as tres universidades públicas galegas, sendo conscientes sempre do fundamental: que conforman o sistema universitario público galego, que é tanto como dicir un dos motores principais de Galicia”.
Na súa intervención, o titular do Executivo autonómico fixo fincapé no compromiso do Goberno galego co sistema universitario. Así, recordou que Galicia foi a “primeira comunidade con matrícula universitaria gratuíta”, e que as taxas levan 15 anos conxeladas. Ambas medidas aforran ás familias galegas 20 millóns de euros ao ano e consolidan ao noso sistema universitario como o máis accesible de España.
“Esa universidade cada vez máis accesible, ese ascensor social baseado no esforzo unha vez que se poñen as circunstancias, creo que é clave”, indicou.
Investimento no sistema universitario
Tamén puxo en valor o compromiso da Xunta co financiamento. De feito, grazas ao impulso do plan vixente, Galicia xa acada un gasto público total nas universidades equivalente ao 1% do PIB. No que atinxe ao financiamento da Xunta, os recursos distribúense a través dun plan financeiro plurianual, o que permite ás universidade planificar a medio prazo.
Neste sentido, avanzou que a Administración autonómica e as universidades comezarán en breve a deseñar un novo plan que reforce a seguridade financeira, a mellora das titulacións, a investigación ou a internacionalización das universidades. “E temos que seguir buscando respostas a retos como o da vivenda, un gran problema xeral para a cidadanía e, polo tanto, tamén para a comunidade universitaria”, sinalou.
Rueda salientou tamén a capacidade de innovación e investigación que atesouran as universidades, que as sitúa na excelencia, ademais de que permite a transferencia de coñecemento á sociedade e ao tecido produtivo. “Toda a potencia investigadora, cada vez máis evidente, do tecido da I+G+i galego, quixemos que estivese directa e expresamente na mesma Consellería que leva as relacións coas universidades; creo que é unha mensaxe de que ao final todo é un conxunto que hai que facer medrar desde a organización”, explicou.
Imaxes relacionadas
