Moaña (Pontevedra), 30 de abril de 2026

A conselleira de Vivenda e Planificación de Infraestruturas, María Martínez Allegue, puxo hoxe en valor o plan da Xunta de inspeccións e conservación de viadutos e pontes, dotado con 13M€ ata 2029. Allegue visitou hoxe a intervención que no marco deste programa está a realizar a  Xunta no viaduto da Moura, na autovía do Morrazo AG-46, ao paso polo concello de Moaña.

Neste viaduto a Xunta está a levar a cabo unha intervención concreta sobre os apoios, co obxectivo de incrementar a funcionalidade, a seguridade e durabilidade desta infraestrutura. Os traballos, que teñen un prazo de execución de dous meses, inclúen tamén a reparación de elementos metálicos.

Esta é unha das 17 actuacións previstas este ano neste plan específico para a inspección e conservación de estruturas e obras de paso da rede viaria autonómica. Trátase dun programa cuxa finalidade é reforzar a conservación preventiva, a inspección, a reparación e o mantemento destas estruturas. Como explicou a conselleira, licitáronse dous contratos específicos neste eido, un de inspección e elaboración de proxectos (ao redor de 5M€) e outro de execución de obras (máis de 8M€).

Así, efectúanse controis constantes sobre elementos como pontes, viadutos, pontóns, sumidoiros, pasarelas, pasos inferiores peonís e outras estruturas vinculadas ás estradas autonómicas, para coñecer o estado real das estruturas e anticipar con planificación as actuacións que sexan precisas, coa execución destas reparacións puntuais de forma máis áxil e preventiva. O obxectivo principal é garantir que estas estruturas manteñan unhas condicións axeitadas de seguridade, funcionalidade e durabilidade.

Allegue subliñou a importancia do eido da conservación con actuacións como a visitada hoxe, “traballos moi importantes para a prevención e mantemento das infraestruturas”. Recordou así mesmo o esforzo da Administración autonómica nas tarefas de conservación ordinaria e vialidade invernal para manter en condicións a rede viaria autonómica, de 5.500 quilómetros.

Entre as 17 actuacións planificadas este ano nas estruturas e obras de paso, ademais da do viaduto da Moura, figuran entre outras intervencións nos viadutos de A Mó e A Fraga, tamén nesta autovía do Morrazo.