Santiago de Compostela, 30 de abril de 2026

O conselleiro de Sanidade, Antonio Gómez Caamaño, reiterou hoxe o seu apoio á creación dun marco de regulación propio das condicións laborais do persoal médico cunha mesa de negociación vinculante e fixo un chamamento ao presidente do Goberno de España para acabar cos paros contra o Estatuto Marco que promove o Executivo estatal. 

O responsable do departamento sanitario da Xunta, Antonio Gómez Caamaño, mantivo un encontro de traballo telemático cos xerentes das sete áreas sanitarias para avaliar o impacto da folga nacional contra a reforma do Estatuto Marco.

Tras comprobar o impacto da folga médica convocada a nivel nacional, que só esta semana xa supuxo a suspensión de 23.771 actos médicos, Gómez Caamaño lamentou que a ministra de Sanidade non teña intención de negociar unha solución. Neste sentido, expresou a súa defensa por un marco normativo propio que recolla as singularidades da profesión médica.

Segundo os datos reportados polos xerentes das sete áreas sanitarias galegas, no día de onte, mércores, a actividade suspendida por mor da folga foi 218 cirurxías, 5.512 consultas hospitalarias, 1.709 consultas de atención primaria e 674 probas diagnósticas.

En total, entre as xornadas do luns, martes e mércores, a actividade suspendida pola folga contra o Estatuto Marco supuxo a suspensión de 642 cirurxías, 16.372 consultas hospitalarias, 4.707 consultas de atención primaria e 2.050 probas diagnósticas.

Durante a súa intervención o conselleiro de Sanidade referiu que o seguimento da folga que este xoves acadou, na quenda de mañá, o 19,61 % de seguimento. 

De novo, a Xunta insta ao Goberno de España a que actúe na procura de acadar un consenso cos profesionais médicos e así poder poñer fin a unhas folgas nas que os principais afectados están a ser os pacientes do conxunto de comunidades autónomas.