Santiago de Compostela, 14 de maio de 2026

Expertos en astronomía, xeointelixencia e teledetección satelital espacial impartirán formación a docentes de centros educativos galegos sobre a eclipse que terá lugar no mes de agosto e que será especialmente visible en Galicia. A Xunta organiza este sábado na Cidade da Cultura unha xornada formativa con conferencias e obradoiros, dentro das accións de divulgación deste fenómeno entre a comunidade educativa.

A xornada Astronomía sen etiquetas. Explorar o ceo desde os Polos Creativos, á que xa se inscribiron 120 docentes, propón ser espazo de encontro, reflexión e divulgación arredor da astronomía, nunha aproximación ao coñecemento do Universo desde as distintas perspectivas científicas, tecnolóxicas, sociais e didácticas.

Nesta xornada formativa participarán relatores de prestixio como Enrique Pérez Montero, investigador invidente do Instituto de Astrofísica de Andalucía do Consello Superior de Investigacións Científicas, especializado no estudo das galaxias e na divulgación científica inclusiva, ou Juan Marcos Álvarez Merinero, educador do proxecto PARTNeR da NASA, ademais de formador na Axencia Espacial Europea (ESA), e especialista no uso pedagóxico da teledetección espacial e o procesamiento de imaxes satelitales. 

Eduardo Ojero Pascual, enxeñeiro e investigador no ámbito aeroespacial vinculado tamén á ESA, é outro dos relatores destas xornadas, un profesional centrado en exploración planetaria e no desenvolvemento de novas tecnoloxías para o sector aeroespacial. Completa a listaxe de conferenciantes Marcos Pérez Maldonado, director da Casa das Ciencias da Coruña, cunha traxectoria vinculada á comunicación da ciencia e á promoción de actividades educativas para achegar a ciencia á cidadanía.

Relatores de prestixio

Conferencias, mesas de debate e obradoiros prácticos forman parte do programa, nun intercambio de experiencias que procura a aplicación práctica dos coñecementos. A inauguración da xornada será ás 09,30 horas. De seguido terá lugar a conferencia inaugural O proxecto astroaccesible, unha achega accessible á astronomía, que correrá a cargo de Enrique Pérez Montero. Juan Marcos Álvarez Merinero impartirá a conferencia titulada Xeointelixencia e teledetección satelital espacial.

Por outra banda, Fátima Mª García Doval, xefa de Servizo de Coordinación Estratéxica e Innovación da Consellería de Educación, explicará a actividade Polos Eclipsados, un programa que converte a eclipse nunha oportunidade para mellorar os coñecementos científicos do alumnado.

Na segunda parte da mañá haberá unha mesa de debate das agrupacións astronómicas galegas: Agrupación Io, Asociación Sirio, A. Astronómica Rías Baixas, AstroVigo e Grupo Vega. A continuación, o experto en grandes misións espaciais europeas Eduardo Ojero Pascual falará sobre O imperio do Sol e Marcos Pérez Maldonado impartirá a conferencia Eclipses: terror, fascinación e aprendizaxe.

Tarde de obradoiros

Pola tarde haberá cinco obradoiros simultáneos en dúas quendas, de modo que cada participante poida asistir a dous deles. Estes espazos prácticos versarán sobre a exploración táctil do universo, aprender mirando o ceo, Galicia desde o espazo, o espazo en 3D ou instrumentos de exploración: o astronógrafo. Ademais dos expertos dos relatorios, impartirán os obradoiros Carmen Álvarez Seoane, Félix Sánchez-Tembleque Díaz-Pache e Juan Carlos Asensi Marzal. O peche da xornada terá lugar ás 17,30 horas.