Santiago de Compostela, 20 de maio de 2026

A conselleira de Economía e Industria, María Jesús Lorenzana, asegurou hoxe que Galicia non vai renunciar a participar nos sectores industriais máis avanzados, como son o sector da defensa, a seguridade e o aerospazo. “Non podemos mirar cara a outro lado cando as empresas galegas teñen unha oportunidade industrial extraordinaria no momento actual”, aseverou.

En resposta a unha pregunta oral no Pleno do Parlamento, a conselleira lembrou que a comunidade autónoma leva máis dunha década apostando polo sector aeroespacial e polas tecnoloxías de alta cualificación, no marco dunha política industrial que o que busca neste momento é “reducir dependencias externas, tanto enerxéticas, como de recursos ou de capacidades industriais para avanzar o máximo posible en autonomía estratéxica”, explicou.

Así, destacou que a política da Xunta neste eido articúlase en torno á Iniciativa Estratéxica en Seguridade, Defensa e Aeroespazo, que mobilizará ata 183 millóns de euros de investimento público entre 2025 e 2030 e preto de 900 millóns de euros adicionais en investimento asociado. Entre os programas de apoio, figuran os novos acordos de asociación con socios estratéxicos e tecnolóxicos, que suporán ata 83 millóns de euros nos próximos cinco anos. E, proximamente, tamén se publicará a convocatoria de axudas para apoiar os investimentos en tecnoloxías duais.

“É responsabilidade da Xunta proporcionar na medida do posible as axudas e o acompañamento que poidan necesitar as empresas para abrirse camiño na realidade económica actual”, concluíu.