Pontevedra, 27 de maio de 2026

O delegado territorial da Xunta en Pontevedra, Agustín Reguera, visitou esta mañá a tenda Aromara, en Pontevedra, con motivo do inicio da nova campaña dos bonos Activa Comercio, que arrancou hoxe en toda Galicia.

Durante a visita, o delegado territorial destacou a importancia desta iniciativa como ferramenta de dinamización do comercio local e de apoio ao consumo de proximidade, nun contexto no que a Xunta busca reforzar a actividade económica nos pequenos e medianos establecementos.

A nova edición dos bonos Activa Comercio permitirá que a cidadanía descargue un bono desconto de ata 30 euros para empregar directamente na compra de produtos nos comercios adheridos. Como principal novidade desta campaña, salienta a posta en marcha dun sorteo complementario a través das contas oficiais da Xunta en TikTok e Instagram, mediante o que se sortearán catro bonos adicionais de 250 euros cada un, en formato dixital, para gastar nos establecementos adheridos ao programa.

O prazo de adhesión dos comercios interesados permanece aberto desde o pasado 27 de marzo e na actualidade hai máis de 5.700 establecementos adheridos en Galicia, dos cales máis de 2.000 se sitúan na provincia e máis de 200 no concello de Pontevedra.

A Xunta de Galicia prevé destinar inicialmente 5 millóns de euros a esta campaña durante 2026, coa que busca revalidar o éxito dunha iniciativa que desde a súa posta en marcha en 2021 xa leva mobilizados máis de 122 millóns de euros en vendas no conxunto da Comunidade.

O programa permite aplicar descontos en función do importe da compra: 5 euros en compras entre 20 e 30 euros, 10 euros entre 30 e 50 euros, e 15 euros en compras superiores a esta última contía, favorecendo así o incremento do consumo nos establecementos de proximidade.