Santiago de Compostela, 4 de xuño de 2026

O conselleiro de Sanidade, Antonio Gómez Caamaño, puxo en valor a recente posta en marcha por parte da Xunta dun programa pioneiro de rehabilitación funcional domiciliaria para pacientes pediátricos con enfermidades raras, co obxectivo de establecer un marco común de actuación e mellorar a calidade e eficiencia destes servizos.

O titular da carteira sanitaria interveu na inauguración da terceira edición de Únicas Talks, para abordar os retos e avances en enfermidades raras. Na xornada tamén participarán o director xeral de Integración e Innovación Asistencial do Sergas, Alfredo Silva, e o xerente da Axencia Galega de Coñecemento en Saúde, Antonio Fernández-Campa.

Gómez Caamaño incidiu en que este programa pioneiro de rehabilitación, que se desenvolverá a través da Federación Galega de Enfermidades Raras, foi elaborado durante cinco meses por un grupo de máis de 25 profesionais do Sergas. 

O conselleiro tamén resaltou que o seu departamento acaba de regular o proceso asistencial xenético de enfermidades raras co obxectivo de acurtar os tempos de diagnóstico nun 30 % e garantir a equidade. A tal efecto, disponse dun protocolo unificado e común para que a abordaxe sexa homoxénea en toda Galicia.

Engadido ao anterior, Gómez Caamaño remarcou que Galicia conta co cribado neonatal máis amplo de España, que inclúe varias enfermidades raras como a inmunodeficiencia combinada grave, a fibrose quística ou a enfermidade de Pompe.

Así mesmo, a comunidade dispón dunha rede asistencial con tres unidades multidisciplinares e circuítos asistenciais para pacientes con enfermidades raras, que xa realizaron preto de 9.000 consultas.

Estratexia galega en enfermidades raras

No seu uso da palabra, o conselleiro referiu que a Estratexia Galega en Enfermidades Raras 2025-2030, posta en marcha pola Xunta, é unha aposta a medio e longo prazo por ordenar recursos e garantir que a innovación chegue de xeito equitativo a todos os pacientes.

Trátase, proseguiu o conselleiro, de construír un modelo que preste asistencia a preto de 6.000 pacientes con enfermidades raras de Galicia.

Gómez Caamaño quere que este modelo de asistencia estea cada vez máis centrado en cada unha das persoas, máis axustado ás súas necesidades específicas e máis sensible á singularidade de cada caso.

O conselleiro tamén se referiu á robotización dos servizos de rehabilitación dos sete grandes hospitais de Galicia e á organización dos primeiros cursos formativos para os profesionais do Servizo Galego de Saúde destinados a mellorar a atención a estes pacientes.