Santiago de Compostela, 04 de xuño de 2026

A directora xeral de Emprego Público e Administración de persoal, Nuria Aguilar, destacou hoxe o profundo proceso de transformación e modernización da xestión dos recursos humanos que está a levar a cabo a Xunta de Galicia para facer fronte aos novos desafíos do emprego público.

Na Comisión 3ª de Economía, Facenda e Orzamentos referiuse á modificación da presentación das solicitudes de inclusión nas listas de contratación, que pasa a ser de forma exclusivamente electrónica. Nuria Aguilar subliñou que a existencia dun sistema electrónico único para a xestión das listas de contratación non só axilizará a tramitación, senón que aumentará as garantías e facilitará a accesibilidade das persoas interesadas, que poderán realizar as súas xestións desde calquera lugar e a calquera hora.

A directora xeral destacou tamén que a modificación do decreto que regula o nomeamento do persoal interino das listas de contratación configura dous tipos de chamamento: o ordinario, que será o empregado con carácter xeral para cobertura dos postos, e o chamamento extraordinario, que se empregará no caso de que concorra unha situación xustificada de urxencia e necesidade inaprazable na cobertura de determinados postos, para evitar graves prexuízos no funcionamento e/ou prestación do servizo.

Para este segundo tipo de chamamentos, o decreto prevé a posibilidade de realizalos vía telefónica ou, como novidade, mediante un SMS urxente.

A directora xeral de Emprego Público e Administración de persoal destacou tamén a eliminación das excepcións ás suspensións dos chamamentos para o persoal aspirante das listas de contratación temporal, tendo en conta que a experiencia nos últimos anos sobre a xestión das listas de contratación temporal puxo de manifesto que esa mellora de emprego provocaba distorsións no funcionamento dos servizos públicos. “E redúcese a penalización dun ano a seis meses no caso de rexeitar ou renunciar a un posto”, engadiu, subliñando que non existirá penalización ao renunciar a un posto con xornada igual ou inferior ao 70 % da xornada ordinaria, ou a un posto de carácter descontinuo cun período de actividade igual ou inferior a seis meses, unha vez transcorridos dous meses desde a data do inicio da prestación de servizos.

Segundo explicou Nuria Aguilar, a modificación do decreto recolle ademais unha nova disposición adicional para establecer medidas extraordinarias de xestión das listas de persoal do Servizo de Prevención e Defensa contra Incendios Forestais (SPIF). Así, a previsión relativa á suspensión automática de chamamentos en todas as listas tras a aceptación dun posto -que se incorpora na nova redacción do artigo 15- contribúe a evitar disfuncións na xestión das listas; en particular, nas listas do SPIF, ao reducir a rotación de efectivos e garantir unha estabilidade mínima dos equipos durante o período de maior actividade operativa, favorecendo unha planificación máis eficiente dos recursos humanos e asegurando unha resposta máis eficaz ante situacións de emerxencia.

O expediente persoal electrónico

Ao longo da súa intervención, a directora xeral de Emprego Público referiuse tamén ao uso e acceso ao expediente persoal electrónico do persoal empregado público, que permite instaurar un procedemento aberto á súa utili­zación polas persoas empregadas públicas e polos cidadáns que teñan intere­se no acceso ao emprego público, mediante unha ferramenta que integra todos os seus datos curriculares nunha contorna electrónica interoperativa e multidisciplinar, que resulta ao mesmo tempo flexible, práctica, áxil e modificable e que evita a necesidade de repetir a entrega de documentación para todos e cada un dos procesos de selección, provisión e desenvolvemento profesional.

“No expediente persoal electrónico queda integrada, nun formato electrónico e nun so­porte único, a información do persoal empregado público, o que facilita a súa xestión e a relación entre os profesionais e a Administración, permitindo tamén que o persoal dispoña dun instrumento que o habilite para a creación e actualización do seu propio currículo”, explicou, precisando que a Canle de emprego público de Galicia (Fides) configurarase como a platafor­ma de acceso ao expediente.

Nuria Aguilar lembrou que, na actualidade, a Canle Fides está utilizándose en procesos como a inscrición e elaboración de listaxes de persoas admitidas e excluídas en procesos selectivos ou nas listas de contratación, ou na solicitude de recoñecemento de grao de carreira administrativa ou complemento de desempeño, así como na súa baremación.

En relación aos concursos de traslados, resaltou que o pasado 29 de maio publicouse no Diario Oficial de Galicia a convocatoria do concurso de traslados das escalas de informática, iniciándose, deste forma, o proxecto piloto de concurso aberto e permanente que se tramitará integramente a través da canle FIDES.

Resolución dos concursos de traslados e toma de posesión coordinada

En relación aos concursos de traslados, resaltou que o pasado 29 de maio publicouse no Diario Oficial de Galicia a convocatoria das escalas de informática, coa que se pon en marcha o proxecto piloto de concurso aberto e permanente que se tramitará integramente a través da canle Fides.

Por último, indicou que unha vez resoltos os concursos de traslados realízanse as tomas de posesión coordinadas coas derivadas dos actos de elección de destino das persoas que superaron procesos selectivos e están pendentes de primeiro destino definitivo, e das persoas que superaron procesos selectivos de estabilización derivados da Lei 20/2021, do 28 de decembro.

Este proceso de tomas de posesión coordinadas iniciouse en outubro de 2025 coas escalas de enxeñarías, ciencias e arquitecturas. E, en xaneiro de 2026, publicouse a convocatoria do acto de elección do persoal das escalas do Servizo de Protección e Defensa contra Incendios Forestais, para realizar posteriormente a toma de posesión coordinada.

Destacou que estes procesos realízanse de forma planificada e remataron sen incidencias, garantindo en todo caso a continuidade na prestación dos servizos públicos.